گھریلو امور سنبھالنے والا ملازم مالک کے لاکھوں روپے اور سامان لیکر غائب

گوجرخان (بیورو رپورٹ)بیرون ملک مقیم شہری کا 22 سال سے گھریلو امور کی دیکھ بھال کرنے والا ملازم مبینہ طور پر لاکھوں روپے اور قیمتی گھریلو سامان لے کر غائب ہوگیا۔ پولیس حکام کے مطابق وارڈ نمبر 7 کے رہائشی خواجہ رب نواز نے اپنے تمام گھریلو امور گزشتہ 22 سال سے طارق محمود سکنہ چنگا بنگیال کے سپرد کر رکھے تھے۔ الزام ہے کہ ملازم مکانوں کے کرایوں کی مد میں وصول ہونے والی 6 لاکھ 24 ہزار روپے کی رقم، ڈیڑھ لاکھ روپے مالیت کی گرِل اور گھر سے ایک لاکھ روپے سے زائد مالیت کا دیگر قیمتی سامان لے کر غائب ہوگیا۔ معاملے کا انکشاف اس وقت ہوا جب مکان کے کرایہ دار حافظ طالب نے اس حوالے سے نشاندہی کی، جس کے بعد مبینہ خوردبرد اور سامان غائب ہونے کے حقائق سامنے آئے۔ پولیس حکام کے مطابق درخواست موصول ہونے پر مقدمہ درج کر لیا گیا ہے جبکہ واقعے کی مزید تفتیش جاری ہے۔