آٹ آف سکول بچوں کو تعلیمی دھارے میں لانا ہمارا مشن: ڈاکٹر ناصر محمود

اسلام آباد(پ ر)علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے علی پور فراش میں ٹینٹ سکول کا افتتاح کیا۔ یہ اقدام وزارتِ وفاقی تعلیم و پیشہ ورانہ تربیت (MoFEPT)، جاپان انٹرنیشنل کوآپریشن ایجنسی (JICA)، نیشنل کمیشن فار ہیومن ڈویلپمنٹ (NCHD)، بیسک ایجوکیشن کمیونٹی اسکولز (BECS) اور نیشنل ایجوکیشن فانڈیشن (NEF) کے باہمی تعاون سے عمل میں لایا گیا۔ افتتاحی تقریب کے موقع پر بچوں میں کتابیں اور اسکول بیگ بھی تقسیم کیے گئے۔تقریب سے خطاب کرتے ہوئے پروفیسر ڈاکٹر ناصر محمود نے کہا کہ تعلیم ہر بچے کا بنیادی حق ہے اور کسی بھی بچے کو اس حق سے محروم نہیں رہنا چاہیے۔ ڈاکٹر ناصر کا کہنا تھا کہ آٹ آف سکول بچوں کو تعلیمی دھارے میں لانا ہمارا مشن ہے جس کے لیے علامہ اقبال اوپن یونیورسٹی اپنے شراکت دار اداروں کے تعاون سے بھرپور کوششیں کر رہی ہے۔ انہوں نے کہا کہ ٹینٹ سکول کا قیام ان بچوں کو تعلیم کے مواقع فراہم کرنے کی جانب ایک اہم قدم ہے جو مختلف وجوہات کی بنا پر اسکول نہیں جا پا رہے۔ ایسے اقدامات سے محروم اور پسماندہ علاقوں کے بچوں کو تعلیم تک رسائی حاصل ہوگی اور ان کے روشن مستقبل کی راہ ہموار ہوگی۔ڈی جی این سی ایچ ڈی علی اصغر نے کہا کہ آٹ آف اسکول بچوں کو تعلیم کی فراہمی ایک اہم قومی ذمہ داری ہے۔ اس مقصد کے لیے تمام متعلقہ اداروں کو مل کر کام کرنا ہوگا تاکہ کوئی بچہ تعلیم سے محروم نہ رہے۔ انہوں نے کہا کہ تعلیمی مواقع کی فراہمی سے نہ صرف بچوں کا مستقبل بہتر بنایا جا سکتا ہے بلکہ معاشرے کی مجموعی ترقی میں بھی اہم کردار ادا کیا جا سکتا ہے۔جائیکا کے نمائندے محمد بلال عزیز نے کہا کہ بچوں کو تعلیم کے یکساں مواقع فراہم کرنا معاشرتی ترقی کے لیے ناگزیر ہے۔ جائیکا تعلیمی شعبے میں بہتری اور آٹ آف اسکول بچوں کو تعلیمی دھارے میں لانے کے لیے اپنے شراکت دار اداروں کے ساتھ تعاون جاری رکھے گا۔ انہوں نے اس عزم کا اظہار کیا کہ مشترکہ کوششوں کے ذریعے زیادہ سے زیادہ بچوں تک تعلیم کی سہولت پہنچائی جائے گی۔تقریب میں وزارتِ وفاقی تعلیم و پیشہ ورانہ تربیت، جائیکا، این سی ایچ ڈی، بی ای سی ایس، این ای ایف اور علامہ اقبال اوپن یونیورسٹی کے رجسٹرار سمیت دیگر شرکا نے شرکت کی۔