وزیراعظم شہباز شریف کا مجوزہ دور ہ روس’ 148 کمپنیوں ‘ 169نمائندوں کی فہرست تیار

ماسکو(ویب ڈیسک)وزیراعظم پاکستان محمد شہباز شریف کے دسمبر کے پہلے ہفتے میں متوقع دور
روس کے سلسلے میں ماسکو میں پاکستان روس بزنس فورم اور دونوں ممالک کے کاروباری اداروں کے درمیان براہ راست تجارتی ملاقاتوں کی تیاریاں جاری ہیں۔اس سلسلے میں پاکستانی سفارت خانے کے ٹریڈ ونگ سے متعلق دو تفصیلی فہرستیں سامنے آئی ہیں، جن میں پاکستان کی 148 کمپنیوں کے 169 نمائندوں کی تفصیلات اور روسی کاروباری اداروں کو بی ٹو بی ملاقاتوں کے لیے مدعو کرنے کی معلومات شامل ہیں۔”خبریں ”کو دستیاب دستاویزات کے مطابق پاکستانی کمپنیوں کی فہرست میں کاروباری اداروں کے نام، نمائندوں کی ذمہ داریاں، متعلقہ صنعتیں اور برآمدی کارکردگی کی تفصیلات درج ہیں، جبکہ روسی کمپنیوں کی فہرست میں اداروں کے نام، کاروباری شعبے اور متعلقہ رابطہ شخصیات شامل ہیں۔وزیراعظم شہباز شریف کے متوقع دور ماسکو کے دوران روسی صدر ولادیمیر پوتن کے ساتھ ملاقات اور دوطرفہ اقتصادی تعاون پر بات چیت بھی متوقع ہے، پاکستانی میڈیا کی حالیہ رپورٹس کے مطابق وزیراعظم کے ہمراہ ایک بڑا کاروباری وفد روس جانے کا امکان ہے اور ماسکو میں مشترکہ بزنس فورم کا پروگرام بھی زیر غور ہے۔پاکستانی کمپنیوں کی تصدیق شدہ فہرست میں سب سے زیادہ نمائندگی ٹیکسٹائل اور چمڑے کی صنعت کی ہے، جس کی 59 کمپنیاں شامل ہیں۔ زرعی و غذائی مصنوعات کی 23، سیاحت کی 15، کھیلوں کے سامان کی 13، کٹلری کی 10، معدنیات کی 6، لاجسٹکس کی 5، جراحی آلات کی 5، انفارمیشن ٹیکنالوجی کی 4، آٹوموٹیو، دھاتوں اور پلاسٹک کی صنعتوں کی دو دو، جبکہ ادویات اور کیمیکلز کی ایک ایک کمپنی فہرست کا حصہ ہے۔
فہرست تیار