ممبئی(ویب ڈیسک)آنجہانی اداکارہ سری دیوی کی آخری رسومات آج ممبئی میں اداکی جائیں گی جس میں شرکت کیلئے اداکارہ مادھوری ڈکشٹ، ہیمامالنی اور ایشوریا رائےبچن سمیت تمام بڑے بالی ووڈ اسٹارز کی آمد کا سلسلہ جاری ہے۔
چار روز قبل دبئی میں دم توڑنے والی اداکارہ سری دیوی کی آخری رسومات آج اداکی جائیں گی۔
آنجہانی اداکارہ سری دیوی چند روز قبل اپنے شوہر بونی کپور اور چھوٹی بیٹی خوشی کپور کے ہمراہ اپنے بھتیجے کی شادی میں شرکت کیلئے دبئی گئی تھیں۔
تاہم کسی کو کیا خبر تھی کہ شادی کی تقریب میں خوشی خوشی شرکت کرنے والی اداکارہ سری دیوی کا یہ آخری سفر ہے۔ چار روز قبل سری دیوی کی موت کی خبر نے ان کے گھروالو ں سمیت دنیا بھر میں موجود ان کے چاہنے والوں کو حیرت زدہ کردیا۔ 
ابتدا میں ان کی موت کی وجہ دل کادورہ قرار دیا جارہا تھا تاہم فرانزک رپورٹ منظر عام پر آنے کے بعد انکشاف ہوا کہ سری دیوی اپنی موت سے قبل نشے میں تھیں اور ان کی موت باتھ ٹب میں ڈوبنے کے باعث ہوئی ہے۔
دبئی پولیس کی جانب سے اداکارہ کی لاش تفتیش کیلئے دبئی پولیس پروسیکیوشن کے حوالے کردی گئی تھی جس کی وجہ سے ان کی لاش واپس بھارت لانے میں تاخیر ہورہی تھی ، تاہم گزشتہ روز تحقیقات مکمل کرنے کے بعد ان کی لاش لواحقین کے حوالے کردی گئی۔ جسے بھارتی صنعتکار مکیش امبانی کے خصوصی طیارے کے ذریعے ممبئی لایا گیا۔
سری دیوی کی میت آج صبح ممبئی لوکھنڈوالا میں سیلیبریشن اسپورٹس کلب میں رکھ دی گئی تھی جہاں ان کا آخری دیدار کرنے کیلئے ان کے گھروالوں سمیت بالی ووڈ کی تمام بڑی شخصیات کی آمد کا سلسلہ جاری ہے۔
اس موقع پر اسپورٹس کلب کے باہر سیکیورٹی کے انتہائی سخت انتظامات کیے گئے ہیں۔
سری دیوی کی آخری رسومات میں شرکت کرنے کیلئے بالی ووڈ اداکارہ مادھوری ڈکشٹ، سونم کپور، ہیمامالنی، کاجول، اجے دیوگن، ریکھا، ایشوریا رائےبچن، جیا بچن سمیت بالی ووڈ کے تقریباً تمام بڑےاسٹارز اسپورٹس کلب پر پہنچ گئے ہیں۔
