محفل موسیقی میں فائرنگ, دلہن کی خودکشی

لاہور (کرائم رپورٹر) نولکھا کے علاقہ میں تین ماہ قبل دلہن بننے والی لڑکی نے نامعلوم وجوہات کی بنا پر پھانسی لے لی۔ جبکہ برکی کے علاقہ میں محفل موسیقی کے دوران تلخ کلامی پر اندھا دھند فائرنگ کے نتیجہ میں 30 سالہ نوجوان قتل، دیگر افراد نے بھاگ کر جانیں بچائیں۔ پولیس نے دو افراد کو حراست میں لے لیا۔ بتایا گیا ہے کہ نولکھا کے علاقہ دو موریہ پل ٹائر مارکیٹ کے قریب رہائش پذیر عمران نامی نوجوان کی تین ماہ قبل عائشہ سے شادی ہوئی جس کے بعد میاں بیوی ہنسی خوشی رہنے لگے۔ رات گئے عائشہ کا شوہر عمران گھر واپس آیا تو بیوی کی پھندا لگی نعش دیکھ کر خوفزدہ ہوگیا، شور سن کر اہلخانہ اور محلے دار اکٹھے ہوگئے۔ اطلاع ملنے پر پولیس موقع پر پہنچ گئی جنہوں نے نعش کو قبضہ میں لے لیا۔ پولیس کے مطابق ورثاءنے بتایا کہ دونوں میاں بیوی ہنسی خوشی رہ رہے تھے، نہ جانے عائشہ نے کیوں خودکشی کرلی جبکہ برکی کے علاقہ برکی روڈ پر واقع فارم ہاﺅس میں رات گئے میوزک شو جاری تھا کہ اس دوران اسد رضا نامی نوجوان کی میوزک شو میں شریک لڑکوں سے تلخ کلامی ہوگئی جنہوں نے طیش میں آ کر اندھا دھند فائرنگ شروع کردی جس سے شو میں بھگدڑ مچ گئی، شو میں شامل لڑکے لڑکیوں اور فنکاروں نے بھاگ کر جانیں بچائیں جبکہ گولیاں لگنے سے اسد رضا لہولہان ہوگیا جسے طبی امداد کیلئے ہسپتال لے جایا گیا جہاں ڈاکٹروں نے اسد کی موت کی تصدیق کردی۔ پولیس کے مطابق ورثاءکی طرف سے تاحال درخواست موصول نہیں ہوئی، درخواست موصول ہونے پر قانونی کارروائی عمل میں لائی جائے گی۔ دریں اثناءبہاولنگر میں آج صبح بوسیدہ مکان کی چھت زوردار دھماکہ سے گر گئی جس کے نتیجہ میں باپ بیٹی جاں بحق ہوگئے جبکہ ایک خاتون زخمی ہوگئی۔ دھماکے کی آواز سن کر اہل محلہ اکٹھے ہوئے جنہوں نے امدادی ٹیموں کی مدد سے ملبہ تلے دبے افراد کو نکال کر طبی امداد کے لیے ہسپتال پہنچا دیا۔