وفاقی وزیر مواصلات مراد سعید نے کہا کہ آزاد کشمیر میں ن لیگ کی حکومت ہے پھر بھی دھاندلی کا رونا رو رہے ہیں۔
تفصیلات کے مطابق وفاقی وزیر مواصلات مراد سعید نے میڈیا سے گفتگو کرتے ہوئے کہا کہ اسلام آباد میں انتخابات سے قبل دھاندلی کا شور مچا رہے ہیں، دھاندلی نہیں آپکے کرتوت شکست کی وجہ بن رہے ہیں، 3 سے 4 مرتبہ باریاں لینے والوں نے آپ کو سہولیات دیں؟ صحت کے فروغ اورغربت کے خاتمے کیلئے انہوں نے کام کیے؟
انہوں نے کہا کہ نوازشریف نے مودی اور جندال نہیں غداروں سے بات کی تھی، فاروق حیدر نے مجھے دھمکی دی، فاروق حیدر کوبتانا چاہتا ہوں پرسوں آپکے حلقے میں آرہا ہوں، فاروق حیدر دکھاوا کر کے روتے ہیں اور مریم جعلی تصاویر کا سہارا لیتی ہیں، آصف زرداری کے دور میں امریکا کو ڈرون حملوں کی اجازت دی گئی، سارا خاندان باہر مفرور اور کشمیری ہونے کا دعویٰ کرتا ہے۔
مراد سعید نے کہا کہ عمران خان نے امریکا کوللکارا تو بلاول سی وی لیکر وہاں پہنچ گیا، بلاول امریکا گئے کہ میں آپ کی ملازمت کے لیے آیا ہوں، اللہ کا نظام ہے آج سارا ٹبر مفرور اور اشتہاری ہے،عوام کیلئے کچھ کرتے تو فوٹوایڈیٹنگ کی ضرورت نہ پڑتی، پرچی لہرا کر آنے والا بھی بڑی بڑی باتیں کررہا تھا۔
انہوں نے یہ بھی کہا کہ حرام کی کمائی پر پلنے والے بھی آزاد کشمیر میں آئے تھے، ایک وہ ہیں جن کی لندن تو کیا پاکستان میں کوئی جائیداد نہیں، بھڑکیں اور اکثریت کا دعویٰ کرنے کے بعد دھاندلی کا شورمچاتے ہیں۔
وفاقی وزیر مواصلات مراد سعید نے مزید کہا کہ کراچی میں بارش کا سنا تو اللہ سے دعا کی عوام کیلئے آسانی کرنا، ورنہ پھر بلاول کہے گا زیاہ بارش ہوتا ہے تو زیادہ پانی آتا ہے، کراچی میں حکمرانوں کی وجہ سے بارش جیسی رحمت زحمت بن جاتی ہے، عوام نے اپنا فیصلہ پہلے ہی سنا دیا ہے، 25 جولائی کو آزاد کشمیر کی عوام نے انکی نیندیں حرام کرنی ہیں، مقبوضہ اور آزاد کشمیر کی عوام نے اپنا فیصلہ خود کرنا ہے۔
