آسٹریلیا : (ویب ڈیسک) آسٹریلوی کرکٹر گلین میکسویل اپنی بھارتی گرل فرینڈ سے رشتہ ازدواج میں منسلک ہوگئے۔
بین الاقوامی میڈیا رپورٹس کے مطابق آسٹریلیا کے آل راؤنڈر گلین میکسویل نے 18 مارچ کو ایک نجی تقریب میں اپنی دوست ‘ونی رمن’ سے شادی کی۔
دونوں نے اپنی شادی کی تصاویر سوشل میڈیا پر شیئر کیں، میکسویل کی اہلیہ نے اپنے انسٹاگرام اکاؤنٹ پر اپنے اور شوہر کے ہاتھ کی تصویر شیئر کی۔
تصویر کے کیپشن میں ونی نے لکھا کہ محبت تکمیل کی تلاش ہے اور آپ کے ساتھ مجھے مکمل ہونا محسوس ہوتا ہے۔
خیال رہے کہ میکسویل اور ونی رمن 2 سال سے زیادہ عرصے سے آپس میں دوست ہیں اور اُنہوں نے فروری 2020 میں انسٹاگرام پوسٹس کے ذریعے اپنی منگنی کا اعلان کیا تھا۔
گلین میکسویل اپنی شادی کی وجہ سے ہی دورہ پاکستان میں شریک نہیں ہو سکے۔
