کراچی: (ویب ڈیسک) الیکشن کمیشن نے این اے 240 کراچی میں بدامنی اوربیلٹ پیپرچوری کیس میں پریذائیڈنگ افسرکی سرزنش کرتے ہوئے انکوائری رپورٹ پر جواب طلب کرلیا۔
چیف الیکشن کمشنرنے کہا کہ معاملے کی تہہ تک جائیں گے، مصطفی کمال کو بتائیں اس بار پیار محبت سے الیکشن ہوگا، فوج اور رینجرز کی بڑی تعداد پولنگ سٹیشنز پر تعینات ہوگی، ووٹرز کو مکمل تحفظ فراہم کیا جائے گا، بلدیاتی انتخابات میں بھی سکیورٹی سخت ہوگی۔۔
دوران سماعت چیف الیکشن کمشنر کا کہنا تھا کہ بیلٹ پیپرز چوری ہوجائیں اور پریذائیڈنگ افسر کہے اس کا دھیان کہیں اور لگا دیا گیا۔
پاک سرزمین پارٹی کے وکیل نے دلائل دیئے کہ پولیس الیکشن کمیشن کو گمراہ کر رہی ہے، الیکشن کمیشن کی اپنی انکوائری رپورٹ میں بھی پولیس نااہلی کا ذکر ہے، انتہائی حساس پولنگ سٹیشنز پر بھی نفری تعینات نہیں تھی، مقدمہ دہشتگردی کی دفعات کے تحت درج ہوا جبکہ کوئی دہشتگردی نہیں ہوئی، ہمارے کارکن کی جان چلی گئی اور ہم پر ہی چھاپے مارے جا رہے۔
چیف الیکشن کمشنرنے کہا کہ یہ تمام باتیں اپنے دلائل میں کریں تو فائدہ ہوگا، تحقیقاتی افسر تعینات کرنا الیکشن کمیشن کا کام نہیں، آپ نے اچھے نقاط اٹھائے ہیں جائزہ لینگے تفتیش درست ہو رہی یا نہیں۔
الیکشن کمیشن نے مزید سماعت یکم اگست تک ملتوی کر دی۔
NA 240 میں بیلٹ پیپر چوری کیس، پریذائیڈنگ افسر سے جواب طلب
