نوازشریف،مریم، خواجہ آصف کیخلاف بھی غداری کے مقدمات بنائے جائیں، شیریں مزاری

اسلام آباد: (ویب ڈیسک) پاکستان تحریک انصاف (پی ٹی آئی) کے رہنما شیریں مزاری نے کہا ہے کہ نواز شریف، مریم نواز اور خواجہ آصف کے خلاف بھی غداری کے مقدمات بنائے جائیں۔
پی ٹی آئی رہنما شیریں مزاری نے پریس کانفرنس کرتے ہوئے کہا کہ اسلام آباد ہائی کورٹ نے ممنوعہ فنڈنگ کیس پر لارجر بینچ بنانے کا فیصلہ کیا ہے۔ وفاقی تحقیقاتی ادارے (ایف آئی اے) نے عمران خان کو خط لکھا کہ 1996 سے اکاؤنٹ کی تفصیلات دیں جبکہ ایف آئی اے کسی ممنوعہ فنڈ کی تحقیقات نہیں کرسکتا اور تحقیقات کرنا ایف آئی اے کے دائرہ اختیار میں نہیں ہے۔
انہوں نے کہا کہ جب اور کچھ نہیں مل رہا تو جھوٹ بول رہے ہیں۔ اسکروٹنی کمیٹی پیپلز پارٹی، مسلم لیگ ن اور پی ٹی آئی کے لیے ہی بنی تھی جو 2018 میں بنائی گئی تھی۔ الیکشن کمیشن پاکستان (ای سی پی) سمجھ رہی ہے کہ لوگ یہ سچ بھول جائیں گے اور الیکشن کمیشن سراسر قانون کے خلاف فیصلہ کر رہا ہے۔
شیریں مزاری نے کہا کہ الیکشن کمیشن نے عدالت کو یقین دہانی کرائی سب جماعتوں کے کیسز سنے جائیں گے لیکن چیف الیکشن کمشنر سیاسی ایجنڈے پر عمل پیرا ہے۔
انہوں نے کہا کہ شہباز گل نے لینڈ لائن پر ٹی وی چینل پر تبصرہ کیا اور اگر شہباز گل نے قانون کی خلاف ورزی کی تو کیس کریں تشدد کیوں ؟ شہباز گل کے جسم پر جگہ جگہ تشدد کے نشانات ہیں۔
پی ٹی آئی رہنما نے کہا کہ نواز شریف، مریم نواز اور خواجہ آصف کے بیانات سب کے سامنے ہیں ان تینوں پر بھی غداری کے مقدمات بنائے جائیں۔
امریکہ پر تنقید کرتے ہوئے انہوں نے کہا کہ امریکہ نے ہماری حکومت کو ہٹانے کی سازش کی۔ امریکی سفیر صوبائی اور وفاقی حکومت سے ملاقاتیں کرتے ہیں اور وہ کس معاہدے کے تحت پاک افغان سرحد کا جائزہ لے سکتا ہے ؟ ہمارے سفیر دوسرے ممالک کے حساس جگہوں پر نہیں جا سکتے ہیں۔
انہوں نے کہا کہ رانا ثنا اللہ تحریک انصاف کے خوف میں پاگل ہو گئے ہیں اور رانا ثنا اللہ ہمیں نہیں ڈرا سکتے، ہم حقیقی آزادی کی جنگ لڑتے رہیں گے۔
پیٹرول کی قیمتوں میں اضافے پر تنقید کرتے ہوئے انہوں نے کہا کہ قوم کو آج ایک اور پیٹرول بم مل گیا جبکہ پیٹرول کی قیمتوں پر مریم نواز ڈرامہ کر رہی ہیں وہ تو خود مجرمہ ہیں۔