ایف پی سی سی آئی اور اپٹما کے وفد کی وزیر مملکت مصدق ملک سے ملاقات

اسلام آباد: (ویب ڈیسک) وفاقی ایوان صنعت وتجارت اور اپٹما کے وفود نے وزیر مملکت برائے پٹرولیم ڈاکٹر مصدق ملک سے ملاقات، بجلی بریک ڈاؤن پر وزیر مملکت نے حکومت کی پوزیشن واضح کی۔
وزیر مملکت نے گزشتہ روز ہونے والے بجلی کے بریک ڈاؤن کی وجوہات سے وفود کو آگاہ کرتے ہوئے کہا کہ بجلی فراہمی کے حوالے سے تمام ضروری اقدامات کیے جارہے ہیں۔
انہوں نے کہا کہ یقین ہے مستقبل میں ایسے واقعات کے تدارک کو حکومت یقینی بنائے گی، حکومت کی پالیسیاں کاروبار دوست رہی ہیں، پٹرول،گیس، ایل این جی سے متعلق جامع پالیسی لا رہے ہیں۔
ایف پی سی سی آئی وفد نے توانائی، پٹرولیم اور گردشی قرضوں کے بارے اپنے تحفظات وزیر مملکت کے سامنے رکھے جس پر وزیر مملکت کا کہنا تھا کہ کاروباری طبقے کے تمام مسائل کا حل حکومت کی اولین ترجیح ہے۔