الیکشن کمیشن پاکستان تحریک انصاف کے سابق چیئرمین عمران خان اور فواد چوہدری کے خلاف توہین الیکشن کمیشن و چیف الیکشن کمشنر کیس کی سماعت 13 دسمبر کواڈیالہ جیل میں کرے گا۔
اس حوالے سے الیکشن کمیشن کی جانب سے کاز لسٹ جاری کردی گئی۔
الیکشن کمیشن نے وزارت داخلہ کی رپورٹ کے بعد محفوظ فیصلہ سناتے ہوئے جیل ٹرائل کا فیصلہ کیا تھا۔
جس کے تحت سابق چیرمین پی ٹی آئی اور فواد چوہدری کے خلاف توہین الیکشن کمیشن و چیف الیکشن کمشنر کیس میں فرد جرم کی کاروائی اڈیالہ جیل میں ہوگی۔
کیس کا پس منظر
یاد رہے کہ الیکشن کمیشن نے 19 اگست کو عمران خان، اسد عمر اور فواد چوہدری کو نوٹسز جاری کیے تھے۔
ترجمان الیکشن کمیشن کا کہنا تھا کہ سیاسی رہنماؤں نے مختلف جلسوں، پریس کانفرنسز اور انٹرویوز کے دوران الیکشن کمیشن اور چیف الیکشن کمشنر پر الزمات عائد کیے تھے جبکہ تینوں پارٹی رہنماؤں کو 30 اگست کو ذاتی حیثیت یا بذریعہ وکیل پیش ہونے کی ہدایت کی گئی تھی۔
