ممبئی: بالی ووڈ میں ‘بِگ بی’ کے نام سے مشہور لیجنڈری اداکار امیتابھ بچن نے ازدواجی زندگی میں محبت بڑھانے کے لیے شادی شدہ جوڑوں کو مفید مشورہ دے دیا۔
بھارتی میڈیا کے مطابق امیتابھ بچن کے مشہور زمانہ شو ‘کون بنے گا کروڑ پتی’ کے نئے سیزن کی حالیہ قسط میں مقابلے کے لیے میاں بیوی نے شرکت کی۔
امیتابھ بچن نے مذکورہ جوڑے سے اُن کی محبت کی کہانی سے متعلق سوال کیا جس پر اُنہوں نے بتایا کہ اُن کی شادی گھر والوں کی مرضی سے ہوئی تھی لیکن بہت جلد دونوں ایک دوسرے کی محبت میں گرفتار ہوگئے تھے۔
جوڑے نے بتایا کہ وہ گزشتہ 25 سال سے ایک ساتھ ہیں اور جہاں بھی گھومنے جاتے ہیں وہاں ریلز (مختصر ویڈیو) لازمی بناتے ہیں۔
امیتابھ بچن نے جوڑے کی بات سُن کر تمام شادی شدہ جوڑوں کو مشورہ دیتے ہوئے کہا کہ ازدواجی زندگی میں رومانس قائم رکھنے کے لیے میاں بیوی دونوں کو چاہیے کہ وہ جہاں بھی گھومنے جائیں وہاں ریلز لازمی بنائیں۔
سینیئر اداکار نے مزید کہا کہ یہ شادی شدہ جوڑوں کے لیے ایک بہت ہی اچھا آئیڈیا ہے، اس سے اُن کے رشتے میں رومانس برقرار رہے گا۔
واضح رہے کہ امیتابھ بچن کی جانب سے شادی شدہ جوڑوں کو مشورہ اس وقت دیا گیا کہ جب اُن کے بیٹے ابھیشیک بچن اور بہو ایشوریا رائے کی علیحدگی کی افواہیں زیرِ گردش ہیں۔
یاد رہے کہ ابھیشیک بچن اور ایشوریا رائے کی شادی سال 2007 میں ہوئی تھی اور ان کے گھر بیٹی آرادھیا کی پیدائش سال 2011 میں ہوئی تھی۔
