پاکستان شوبز کی اداکارہ ریما نے بھی امریکی انتخابات 2024 میں اپنا حق رائے دہی استعمال کرتے ہوئے حصہ لیا ہے۔
ریما نے اپنے آفیشل انسٹاگرام اکاؤنٹ پر شوہر کے ہمراہ تصویر شیئر کی ہے جس میں وہ پولنگ اسٹیشن میں موجود ہیں۔ ریما نے انسٹاگرام پر اسٹوری بھی پوسٹ کی ہے جس میں انہیں اپنا ووٹ کاسٹ کرتے دیکھا جاسکتا ہے۔
تصویر کے کیپشن میں اداکارہ نے لکھا کہ ’میں اور طارق صدارتی انتخابات 2024 میں اپنا ووٹ کاسٹ کر رہے ہیں، ریما نے کیپشن میں ہیش ٹیگ ووٹ، یو ایس الیکشن کا استعمال کیا ہے۔
اداکارہ کی پوسٹ پر ان کے مداح اور صارفین نے سوالوں کا ڈھیر لگا دیا کہ ریما نے امریکی انتخابات میں ریپبلکن پارٹی کے ڈونلڈ ٹرمپ کو ووٹ دیا ہے یا ڈیموکریٹک پارٹی کی کملا ہیرس کے حق میں اپنا حق رائے دہی استعمال کیا ہے تاہم اداکارہ نے اس بارے میں کوئی معلومات فراہم نہیں کی۔
اداکارہ کی پوسٹ کے کمنٹ سیکشن میں ان کے مداح سوال کررہے ہیں کہ آخر ریما اور ان کے شوہر کس کو سپورٹ کرتے ہیں جبکہ کئی صارفین نے اندازہ لگایا ہے کہ اداکارہ نے ڈونلڈ ٹرمپ کو ہی ووٹ دیا ہوگا۔
واضح رہے کہ ریما پاکستانی نژاد امریکی ڈاکٹر طارق شہاب سے 2011 میں رشتہ ازدواج میں منسلک ہوئی تھیں اور شوہر کے ہمراہ امریکہ منتقل ہوگئیں تھیں جس کے بعد انہیں امریکہ کی شہریت بھی مل گئی ڈاکٹر طارق سے اداکارہ کا ایک بیٹا بھی ہے جس کا نام علی شہاب ہے۔
