ن لیگ ،پی پی کا خفیہ گٹھ جوڑ ، پی ٹی آئی میں جانیوالوں کے خلاف اہم فیصلہ

لاہور (خصوصی رپورٹ) مسلم لیگ ن نے اپنی قیادت کیخلاف تحریک انصاف کی جارحانہ پالیسی پر تحریک انصاف کو ٹارگٹ کرنے کیلئے حکمت عملی تیار کرلی ہے‘ جس کے تحت وہ پیپلزپارٹی کی خفیہ سپورٹ کرے گی۔ مصدقہ ذرائع کے مطابق ن لیگ پنجاب میں پیپلزپارٹی اور دیگر سیاسی جماعتوں کو چھوڑ کر تحریک انصاف میں شمولیت اختیار کرنے والے اہم رہنماﺅں نذر محمد گوندل‘ فردوس عاشق اعوان‘ راجہ ریاض اور دیگر سے متعلق وائٹ پیپر شائع کرے گی۔ نذر محمد گوندل کے ای او بی سکینڈل‘ فردوس عاشق اعوان اور دیگر پر لگنے والے الزامات اور ان کی تحریک انصاف کے متعلق سابقہ الیکشن میں تقاریر کو سامنے لایا جائے گا۔ آئندہ چند روز میں نذر محمد گوندل اور ان کے بھائی ذوالفقار گوندل کے حلقوں میں لوٹے پکڑ کر جلوس نکالا جائے گا۔ ن لیگ اپنی مہم کا آغاز اس نعرے ”کیا نیا پاکستان یہ لوگ بنائیں گے؟ سے کرے گی۔ ن لیگ کے ذرائع کا یہ بھی کہنا ہے کہ پیپلزپارٹی کے جو رہنما تحریک انصاف میں جارہے ہیں اور مزید جن کے جانے کے امکانات ہیں کے گھروں کے باہر لوٹے اٹھا کر جلوس نکالنے کیلئے پیپلزپارٹی کے کارکنوں کو بھی بھرپور سپورٹ فراہم کی جائے گی۔ پیپلزپارٹی کی سپورٹ کا مقصد تحریک انصاف میں کسی بھی جماعت کے رہنماﺅں کی شمولیت کو روکنا ہے۔ علاوہ ازیں تحریک انصاف کے باغی گروپوں کو بھی عمران خان کیخلاف اور پارٹی میں نئے شامل ہونے والوں کیخلاف بھرپور طریقہ سے میڈیا مہم چلانے کیلئے ن لیگ میڈیا سیل کے دو افراد کو ذمہ داری دے دی گئی ہے۔ بظاہر ن لیگ اور پیپلزپارٹی ایک دوسرے کے خلاف سخت بیان بازی جاری رکھے گی مگر پس پردہ ن لیگ پنجاب کے اندر پیپلزپارٹی کو جو سہولت ہوسکے گی وہ دے گی۔ اس حوالے سے پیپلزپارٹی کی اعلیٰ قیادت زیادہ وقت اب پنجاب میں گزارے گی اور اس کو سکیورٹی سے لے کر دیگر معاملات میں ن لیگ کی جانب سے مکمل سپورٹ ہوگی۔ اس سلسلہ میں ایک سنیٹر ان سے مسلسل رابطہ میں رہیں گے۔