کیری کا قہوہ اس لیے مختلف ہوتا ہے کہ یہ جسم کی گرمی کو دور کرنے کے علاوہ مختلف امراض سے محفوظ رکھتا ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں ڈاکٹر عائشہ نے کیری کا قہوہ بنانے کی ترکیب بیان کی اور بتایا کہ یہ قہوہ نہ صرف جسم کو ٹھنڈک فراہم کرتا ہے بلکہ وزن کم کرنے میں بھی معاون ثابت ہوتا ہے۔
انہوں نے بتایا کہ کچی کیری کا استعمال معدے کے عوارض سے بچاﺅ میں مدد دیتا ہے جو موسم گرما میں کافی عام ہوجاتے ہیں، کیری کھانے کی عادت قبض، ہیضے، سینے کی جلن اور متلی کی کیفیت اور بدہضمی سے تحفظ یا ان کا اچھا علاج ثابت ہوتی ہے۔
ڈاکٹر عائشہ نے کیری کا قہوہ بنانے کی ترکیب بتائی، انہوں نے بتایا کہ کچی کیری کے ٹکڑے لے کر اُبال لیں اس میں آدھا چمچ زیرہ پاؤڈر، آدھا چمچ سونف پاؤڈر، چند پودینے کے پتے اور ہرا دھنیا شامل کرلیں۔
ذائقے کے لیے چینی کے بجائے تھوڑی سی مقدار میں گڑ بھی ڈالا جاسکتا ہے، تاہم وزن کم کرنے کے بہتر نتائج کے لیے گڑ شامل نہ کریں تو بہتر ہوگا۔
ڈاکٹر عائشہ کے مطابق قہوے کو دن میں دو مرتبہ استعمال کیا جا سکتا ہے چونکہ یہ گرم پانی میں پکا ہوتا ہے اس لیے گلے پر منفی اثرات کا خدشہ بھی کم ہوتا ہے۔
یہ مشروب نہ صرف گرمی کی شدت کو کم کرتا ہے بلکہ نظامِ ہاضمہ کو بہتر بنا کر وزن میں کمی میں بھی مدد دیتا ہے۔
