بحرین کے شاہ حمد بن عیسیٰ آل خلیفہ اور اسرائیل کے صدر اسحاق ہرزوگ کے درمیان ٹیلی فون پر رابطہ ہوا، جس میں دونوں رہنماؤں نے دوطرفہ تعلقات، خطے کی تازہ صورتحال اور ابراہم معاہدوں کے مستقبل پر تبادلۂ خیال کیا۔
بحرینی سرکاری خبر رساں ایجنسی کے مطابق، گفتگو میں اس بات پر زور دیا گیا کہ ابراہم معاہدے مشرقِ وسطیٰ میں امن، استحکام اور خوشحالی کے فروغ میں اہم کردار ادا کر سکتے ہیں۔ دونوں رہنماؤں نے خطے میں کشیدگی کم کرنے اور تعاون کو مزید مضبوط بنانے کی ضرورت پر بھی اتفاق کیا۔
اسرائیلی صدر اسحاق ہرزوگ نے گفتگو کے بعد کہا کہ بحرین مشرقِ وسطیٰ کا ایک اہم شراکت دار ہے اور شاہ حمد کی قیادت خطے میں امن و استحکام کے فروغ کے لیے قابلِ قدر ہے۔ انہوں نے دونوں ممالک کے درمیان تعلقات کو مزید وسعت دینے کے عزم کا بھی اظہار کیا۔
واضح رہے کہ ابراہم معاہدے 2020 میں امریکہ کی ثالثی میں طے پائے تھے، جن کے تحت بحرین اور اسرائیل نے سفارتی تعلقات قائم کیے تھے۔ حالیہ رابطہ ایسے وقت میں ہوا ہے جب مشرقِ وسطیٰ میں سکیورٹی صورتحال اور علاقائی کشیدگی پر عالمی توجہ مرکوز ہے۔
