راولپنڈی اور اسلام آباد میں موسلادھار بارش کے باعث نشیبی علاقوں میں سیلابی صورتحال پیدا ہوگئی، جبکہ نالہ لئی میں پانی کی سطح خطرناک حد تک بلند ہوگئی۔ حکام نے متاثرہ اور نشیبی علاقوں کے رہائشیوں کو محتاط رہنے اور ضرورت پڑنے پر محفوظ مقامات پر منتقل ہونے کی ہدایت کردی۔
واسا کے مطابق نالہ لئی کے کٹاریاں پل پر پانی کی سطح 27.5 فٹ تک پہنچ گئی، جو 20 فٹ کے انخلا کے مقررہ حد سے کہیں زیادہ ہے، جبکہ گوالمنڈی کے مقام پر پانی کی سطح 21.5 فٹ ریکارڈ کی گئی۔ شدید بارش کے باعث پانی کی سطح میں مزید اضافے کا خدشہ بھی ظاہر کیا گیا ہے۔
شدید بارش سے راولپنڈی کے متعدد نشیبی علاقوں اور سڑکوں پر پانی جمع ہوگیا۔ لیاقت باغ، کمیٹی چوک انڈر پاس، مری روڈ، ڈھوک کھبہ، سرکلر روڈ اور صادق آباد سمیت مختلف علاقوں میں واسا کی ٹیمیں اور بھاری مشینری تعینات کردی گئی ہے۔
رپورٹس کے مطابق نالہ لئی کے کیچمنٹ ایریاز میں 200 ملی میٹر سے زائد بارش ریکارڈ ہوئی، جس کے باعث نالے میں پانی کا بہاؤ تیزی سے بڑھا۔ انتظامیہ نے متعلقہ اداروں کو ہائی الرٹ کرتے ہوئے نشیبی علاقوں میں انخلا اور ہنگامی اقدامات کی تیاری کی ہدایت کی ہے۔
دوسری جانب شدید بارش کے باعث راولپنڈی میں سرکاری و نجی تعلیمی ادارے بھی بند رکھنے کا اعلان کیا گیا ہے، جبکہ شہریوں کو غیر ضروری سفر سے گریز اور نالوں و نشیبی علاقوں سے دور رہنے کی ہدایت کی گئی ہے۔
صورتحال کے پیش نظر واسا، ریسکیو 1122، سول ڈیفنس اور دیگر متعلقہ اداروں کو ہائی الرٹ کردیا گیا ہے، جبکہ نالہ لئی اور شہر کے دیگر نالوں میں پانی کی سطح کی مسلسل نگرانی جاری ہے۔
