وفاقی حکومت نے میجر جنرل فیصل نصیر کو نیشنل کاؤنٹر ٹیررازم اتھارٹی (نیکٹا) کا نیشنل کوآرڈینیٹر مقرر کردیا ہے۔ اسٹیبلشمنٹ ڈویژن کی جانب سے جاری نوٹیفکیشن کے مطابق یہ تقرری تین سال کے لیے اسیکنڈمنٹ/ڈیپوٹیشن کی بنیاد پر کی گئی ہے۔
نوٹیفکیشن کے مطابق میجر جنرل فیصل نصیر کی تعیناتی وفاقی حکومت کی منظوری سے نیکٹا ایکٹ 2013 کی دفعہ 9(1) کے تحت عمل میں آئی ہے اور اس کا اطلاق فوری طور پر ہوگا۔
میجر جنرل فیصل نصیر اس سے قبل انٹر سروسز انٹیلی جنس (آئی ایس آئی) میں ڈائریکٹر جنرل کاؤنٹر انٹیلی جنس کے طور پر خدمات انجام دے چکے ہیں۔ نیکٹا میں نئی ذمہ داری کے تحت وہ ملک میں انسدادِ دہشت گردی کی حکمتِ عملی اور متعلقہ اداروں کے درمیان رابطہ کاری میں اہم کردار ادا کریں گے۔
نیکٹا وزارتِ داخلہ کے تحت ملک کا مرکزی انسدادِ دہشت گردی ادارہ ہے، جو دہشت گردی اور انتہاپسندی کے خلاف قومی حکمتِ عملی اور ایکشن پلان تیار کرنے، ان پر عمل درآمد کی نگرانی اور متعلقہ اداروں کے درمیان رابطہ کاری کا ذمہ دار ہے۔
یہ تقرری ایسے وقت میں سامنے آئی ہے جب پاکستان دہشت گردی کے خلاف اقدامات اور سکیورٹی اداروں کے درمیان مؤثر رابطہ کاری کو مزید مضبوط بنانے پر توجہ دے رہا ہے۔
