انویسٹی گیشن پولیس لاہور بچھڑوں کو اپنوں سے ملوانے کے مشن پر سرگرم

لاہور(کر ائم رپو رٹر)انویسٹی گیشن پولیس
لاہور بچھڑوں کو اپنوں سے ملوانے کے مشن پر سرگرم عمل ہے۔ انچارج انویسٹی گیشن تھانہ گوالمنڈی شیخ احمد نے پولیس ٹیم کے ہمراہ کارروائی کرتے ہوئے 30 سالہ ذہنی معذور محمد شعیب کو تلاش کرکے بحفاظت اس کے ورثاء کے حوالے کر دیا۔پولیس کے مطابق محمد شعیب اپنے ورثاء کے ہمراہ ہسپتال علاج معالجے کے لیے آیا تھا، جہاں سے وہ لاپتہ ہوگیا۔ واقعہ کے بعد محمد شعیب کے ورثاء نے تھانہ گوالمنڈی میں اس کے اغواء کا مقدمہ درج کروایا تھا۔ایس پی انویسٹی گیشن سٹی فرحت عباس کے مطابق پولیس ٹیم نے جدید ٹیکنالوجی، سی سی ٹی وی کیمروں اور ہیومین انٹیلیجنس کی مدد سے محمد شعیب کی تلاش شروع کی اور کامیاب کارروائی کرتے ہوئے اسے تلاش کرلیا۔محمد شعیب کی بحفاظت بازیابی پر اس کے ورثاء نے انویسٹی گیشن پولیس ٹیم کا شکریہ ادا کیا اور پولیس کی کاوشوں کو سراہا۔ڈی آئی جی انویسٹی گیشن سید ذیشان رضا نے کہا کہ شہریوں کے جان و مال کے تحفظ اور بچھڑوں کو اپنوں سے ملوانے کے لیے انویسٹی گیشن پولیس شب و روز کوشاں ہے۔ایس ایس پی انویسٹی گیشن محمد نوید نے کامیاب کارروائی کرنے والی پولیس ٹیم کے لیے تعریفی اسناد دینے کا اعلان بھی کیا۔