لاہور، بالا کوٹ(نیوز ایجنسیاں)پنجاب کے مختلف شہروں میں گرج چمک کے ساتھ موسلادھار بارش نے موسم
خوشگوار بنا دیا، ٹھنڈی ہوائوں کے باعث گرمی اور حبس کا زور ٹوٹ گیا، محکمہ موسمیات نے آئندہ چوبیس گھنٹوں کے دوران مزید بارشوں کی پیشگوئی کی ہے، ادھر بالا کوٹ میں آسمانی بجلی گرنے سے 2 کم سن بہنیں جاں بحق ہوگئیں۔لاہورکے علاقوں گڑھی شاہو، دھرم پورہ، مغل پورہ، ہربنس پورہ، لال پل، فتح گڑھ، مسلم ٹا ئون، اچھرہ، جین مندر، چوبرجی، ملتان روڈ، ماڈل ٹاون، گرین ٹاون، کوٹ لکھپت، نشتر سمیت مختلف علاقوں میں کہیں ہلکی توکہیں تیز بارش ریکارڈکی گئی ۔واسا لاہور کی جانب سے بیان کے مطابق لاہور میں سب سے زیادہ بارش اپر مال پر37.6ملی میٹر ریکارڈکی گئی،تاج پورہ ایس ڈی او آفس میں 26.6،اقبال ٹائون ایس ڈی او آفس میں 25.4،شاد ی پورہ میں 23.4، لکشمی چوک میں 22.6،نشتر ٹاؤن ڈائریکٹر آفس میں 22.2،جوہر ٹائون ایس ڈی او آفس 21.6،تاج باغ ڈسپوزل میں 21.2،گارڈن ٹائون علی بلاک میں 21.6،چوک ناخدامیں 19.4، سمن آباد ایس ڈی او آفس میں 18.2 ،جیل روڈ پر17اور واسا ہیڈ آفس گلبرگ میں 17ملی میٹر بارش ریکارڈکی گئی۔ادھر گجرات،حافظ آباد، کامونکی، فیروزوالا، قصور، خانقاہ ڈوگراں، سلانوالی، وزیرآباد، بھلوال، گوجرخان، ڈسکہ اور شکرگڑھ سمیت پنجاب کے مختلف شہروں اور گردونواح میں موسلادھار بارش کا سلسلہ جاری رہا ۔گجرات میں طوفانی بارش کے باعث متعدد علاقوں میں پانی جمع ہوگیا،جس سے شہریوں کو آمدورفت میں مشکلات کا سامنا ہے،وزیرآباد میں شدید بارش کے بعد نشیبی علاقے زیرآب آگئے جبکہ گیپکو کے متعدد فیڈرز ٹرپ ہونے سے بجلی کی فراہمی متاثر ہوئی۔کامونکی اورشکرگڑھ میں بھی بارش شروع ہوتے ہی متعدد فیڈرز ٹرپ کرگئے،جس کے باعث شہراورگردونواح کے درجنوں دیہات میں بجلی کی فراہمی معطل ہوگئی۔قصور،ڈسکہ،بھلوال،گوجرخان،خانقاہ ڈوگراں اورسلانوالی میں بھی بارش سے موسم خوشگوار ہوگیا، شہریوں نے گرمی کی شدت میں کمی پر سکھ کا سانس لیا۔دوسری جانب محکمہ موسمیات نے آئندہ چوبیس گھنٹوں کے دوران بھی مزید بارشوں کی پیشگوئی کی ہے۔محکمہ موسمیات کے مطابق اسلا م آباد میں گرج چمک کے ساتھ بارش ہو گی ،بالائی علاقوں میں بارش کا سلسلہ بھی جاری رہے گا۔ کشمیر، گلگت بلتستان، خیبرپختونخوا اور پنجاب کے مختلف علاقوں میں بھی بارش ہو گی۔ ندی نالوں میں طغیانی کے خطرے کے پیش نظر شہریوں کومحتاط رہنے کی بھی ہدایت کی گئی ہے۔محکمہ موسمیات کے مطابق 18 ستمبر تک بالائی علاقوں میں بارش اور گرج چمک کا سلسلہ جاری رہ سکتا ہے،شہری بارش کے دوران ندی نالوں، انڈر پاسز اور نشیبی راستوں سے گزرنے میں احتیاط کریں۔دوسری جانب بالاکوٹ میں وادی منور سیریاں کے مقام پر آسمانی بجلی گرنے سے 2 کمسن بہنیں جاں بحق ہوگئیں۔پولیس کے مطابق آسمانی بجلی گرنے سے دو گھروں کا بھی نقصان پہنچا جس کے نتیجے میں مکان کے ملبے تلے دب کر 2 خواتین سمیت 3 افراد زخمی ہوئے۔ریسکیو 1122 کے عملے نے زخمیوں کو ملبے سے نکال کر مقامی اسپتال منتقل کر دیا۔
بارش
