پاک چین تعاون سے 200 اساتذہ کی ڈیجیٹل مارکیٹنگ تربیت مکمل

لاہور (این این آئی) پاکستان اور چین کے تعاون سے پاکستانی اساتذہ کی ڈیجیٹل صلاحیتوں میں اضافے کے لیے منعقدہ دو ہفتوں پر مشتمل بین الاقوامی تربیتی پروگرام کامیابی سے اختتام پذیر ہوگیا۔ تربیتی پروگرام میں جدید ڈیجیٹل مارکیٹنگ  ٹیکنالوجیز کے عملی استعمال پر توجہ مرکوز کی گئی جن میں سرچ رینکنگ، ریکمینڈیشن انجن، سوشل میڈیا، ایپ مارکیٹنگ اور منی پروگرامز شامل ہیں۔ خصوصی طور پر سرحد پار ای کامرس کی حکمتِ عملیوں میں ان ٹیکنالوجیز کے اطلاق پر زور دیا گیا۔ پاکستان بھر کے سرکاری اور نجی شعبے کے اداروں سے تعلق رکھنے والے تقریباً 200 اساتذہ نے اس تربیتی پروگرام میں شرکت کی۔ شرکاء کو روزانہ دو گھنٹے تربیت فراہم کی گئی۔ یہ پروگرام سلک روڈ ڈیجیٹل ٹریڈ اکیڈمی کے تحت GTTI گلبرگ لاہور میں قائم کیے گئے، نئے سینٹر آف ایکسی لینس میں منعقد ہوا جہاں کلاسز آن کیمپس اور آن لائن، دونوں طریقوں سے منعقد کی گئیں۔ یہ پروگرام یونی انٹرنیشنل اور چین کی آئی ٹی ایم سی ٹیکنالوجی کمپنی نے چیجیانگ ٹیکنیکل انسٹیٹیوٹ آف اکنامکس کے تعاون سے منعقد کیا۔ پروگرام کو نیشنل ووکیشنل اینڈ ٹیکنیکل ٹریننگ کمیشن اور وزیراعظم یوتھ پروگرام کی معاونت حاصل تھی۔