آلودگی پھیلانے والے 37یونٹ مسمار، سموگ سے قبل کریک ڈائون مزید سخت

لاہور (این این آئی)ڈی جی ماحولیات پنجاب عبداللہ نائیر شیخ کی ہدایت پر ڈرون اسکواڈ، نائٹ اسکواڈ اور ہاک آئی فیلڈ اسکواڈ کی جانب سے
آلودگی پھیلانے والوں کے خلاف کریک ڈائون مزید تیز کر دیا گیا ، گزشتہ 24گھنٹے کے دوران ڈرون اسکواڈ اور نائٹ اسکواڈ کی مسلسل نگرانی کے نتیجے میں صوبہ بھر میں 37آلودگی پھیلانے والے یونٹس مسمار کر دیئے گئے، جن میں 21اینٹوں کے بھٹے اور 16صنعتی یونٹس شامل ہیں۔ ترجمان کے مطابق ڈرون اسکواڈ کی فضائی نگرانی، نائٹ اسکواڈ کی رات بھر کارروائیاں اور ہاک آئی فیلڈ اسکواڈ کی زمینی مانیٹرنگ، آلودگی پھیلانے والوں کے خلاف تین سطحی نگرانی اور فوری ایکشن جاری ہے ۔ ڈرونز کے ذریعے سموگ ہاٹ اسپاٹس اور آلودگی کے ذرائع کی نشاندہی، نائٹ اسکواڈ اور ہاک آئی ٹیموں کی جانب سے موقع پر پہنچ کر کارروائی کی جا رہی ہے ۔ گزشتہ 24گھنٹے میں 441اینٹوں کے بھٹوں اور 270صنعتی یونٹس کی انسپیکشن، خلاف ورزیوں پر 37یونٹس مسمار کر دیئے گئے۔ اینٹوں کے بھٹوں کے خلاف کارروائی میں 21بھٹے مسمار، 4سیل، 6 ایف آئی آرز درج جبکہ 25لاکھ روپے جرمانہ عائد کیا گیا ۔صنعتی یونٹس کے خلاف کریک ڈائون میں 16یونٹس مسمار، 5سیل، ایک ایف آئی آر درج جبکہ 16لاکھ روپے جرمانہ عائد کیا گیا ۔ ڈرون اور نائٹ اسکواڈ کی نگرانی میں پلاسٹک کے خلاف بھی کارروائیاں، 253انسپیکشنز کے دوران 3ہزار 145کلوگرام پلاسٹک ضبط اور 26مقامات سیل کیے گئے ۔ باربی کیو اور کمرشل ککنگ پوائنٹس بھی ڈرون اور نائٹ اسکواڈ کی نگرانی میں، 52مقامات کی چیکنگ، 30مقامات پر سکشن ہڈز نصب ،کمرشل کچنز اور باربی کیو پوائنٹس سے دھوئیں کے اخراج کی نگرانی مزید سخت، سکشن ہڈز کی تنصیب کے ساتھ ان کی موثر فعالیت بھی یقینی بنائی جائے گی۔