لاہور(جنرل رپورٹر) وائس چانسلر پنجاب یونیورسٹی پروفیسر ڈاکٹر محمد علی نے کہا ہے کہ نبی کریم ۖ کی آمد کا دن بنی نوع انسان کی تاریخ کا سب
سے بہترین دن ہے۔ وہ پنجاب یونیورسٹی میلا د کمیٹی کے زیر اہتمام محفل میلا د نبی ۖ سے لا کالج کے آڈیٹوریم میں خطاب کررہے تھے۔ اس موقع پرپرنسپل پنجاب یونیورسٹی لا کالج پروفیسر ڈاکٹر امان اللہ ملک، رجسٹرار ڈاکٹر احمد اسلام، خزانہ دار تسنیم کامران،کنٹرولر امتحانات محمد رف نواز،معروف مذہبی سکالرپروفیسرڈاکٹر مجاہد،چیئرمین میلاد کمیٹی ثنا اللہ شاہ،محمداکرم جوئیہ اورملازمین نے بڑی تعداد میں شرکت کی۔ اپنے خطاب میں وائس چانسلر پروفیسر ڈاکٹر محمد علی نے کہا کہ دنیا کا قانون و نظام آپ ۖ کی مرہون منت ہے۔ انہوں نے کہا کہ سچے عاشق رسول کیلئے ضروری ہے آپ ۖ کی تعلیمات پر عمل کرے۔ انہوں نے کہا کہ دنیا و آخرت میں کامیابی پرہیز گاری اور تقوی اختیار کرنے میں ہے۔ انہوں نے کہا کہ نبی کریمۖ کے انسانیت پر اتنے احسانات ہیں کہ گنواتے گنواتے الفاظ کم پڑجائیں۔انہوں نے کہا کہ ہم سب کو آ پ ۖ کے اسوہ حسنہ پر عمل پیرا ہوتے ہوئے ایک دوسرے کی عزت و احترام کرنا چاہیے۔ انہوں نے بہترین تقریب کے انعقاد پر میلاد کمیٹی کے ممبران، نعت خواں اور مقررین کی تعریف کی اور آئندہ بھی ایسے محافل جاری رکھنے کے عزم کا اعادہ کیا۔اپنے خطاب میں پروفیسر ڈاکٹر مجاہد نے کہا کہ آپ ۖ کا سیرت و کردار ہماری کامیابی کا ذریعہ ہے۔ انہوں نے کہا کہ آپ ۖ کی آمد نے دنیا کو جہالت کے اندھیروں سے نکال کر علم کی روشنی سے منور کیا۔انہوں نے کہا کہ آپ ۖ کے آنے سے دنیا کو تہذیب اور شعور ملا ہے۔ انہوں نے کہا کہ آپ ۖ نہ صرف مسلمانوں بلکہ غیر مسلموں سے بھی حسن سلوک سے پیش آتے تھے۔انہوں نے کہا کہ امت کوتقسیم کرنے کی بجائے متحد رہنے کی ضرورت ہے۔
