لاہور (این این آئی) ڈی آئی جی ٹریفک پنجاب محمد وقاص نذیر کے احکامات پر پریشر ہارن استعمال کرنے والوں کے خلاف سخت کریک ڈائون جاری ہے، صوبہ بھر میں پریشر ہارن کے خلاف کارروائیوں میں 252 فیصد اضافہ ریکارڈ کیا گیا ہے۔ ترجمان کے مطابق گزشتہ 48 گھنٹوں میں 4500 سے زائد پریشر ہارن استعمال کرنے والی گاڑیوں کو بھاری جرمانے کیے گئے۔ 34 سے زائد سرکاری گاڑیوں کے بھی پریشر ہارن کے استعمال پر چالان کیے گئے۔ ترجمان کے مطابق مسلسل لگاتار ہارن کے استعمال پر بھی سخت کارروائیاں جاری ہیں، صوبہ بھر میں صوتی آلودگی کے خاتمے کے لیے بلاتفریق کارروائیاں جاری ہیں، صوبہ بھر میں پریشر ہارن کے استعمال پر سخت پابندی عائد ہے، صوبہ بھر میں پریشر ہارن کے خلاف سخت مہم جاری رہے گی۔ اس حوالے سے ڈی آئی جی ٹریفک وقاص نذیر نے کہا کہ صوتی آلودگی کا خاتمہ شہریوں کے تعاون سے مشروط ہے، پریشر ہارن اور مسلسل ہارن کا استعمال انسانی سماعت اور اعصابی صحت کے لیے نقصان دہ ہے۔ پریشر ہارن کے خلاف کریک ڈائون سے شور کی آلودگی میں کمی واقع ہوگی۔ محفوظ پر سکون اور ماحول دوست سڑکیں سے ہی محفوظ ڈرائیونگ ممکن ہے۔
