پنجاب کے سرکاری ہسپتالوں میں وینٹی لیٹرز کی دستیابی کا بحران

لاہور (جنرل رپورٹر) پنجاب کے سرکاری ہسپتالوں میں انتہائی تشویشناک مریضوں کے لیے وینٹی لیٹرز کی دستیابی کا بحران سنگین صورت اختیار کر گیا۔ محکمہ صحت کی مختلف رپورٹس کے مطابق صوبے کے تدریسی ہسپتالوں میں صرف1785 وینٹی لیٹرز موجود’ 431 وینٹی لیٹرز غیر فعال ۔ تفصیلات کے مطابق پنجاب کے سرکاری ہسپتالوں کی مجموعی بیڈ گنجائش کے تناسب سے تقریبا 3,406 وینٹی لیٹرز درکار ہیں۔ رپورٹ کے مطابق فروری میں پنجاب کے36 اضلاع کے پبلک سیکٹر ہسپتالوں میں صرف411 وینٹی لیٹرز موجود تھے۔ نومبر2024 میں محکمہ صحت کی رپورٹ کے مطابق چھ بڑے ہسپتالوں کے آئی سی یوز میں موجود545 وینٹی لیٹرز میں سے184 غیر فعال تھے صرف میو ہسپتال میں170 میں سے 42، ایل جی ایچ میں129 میں سے 47 اور سروسز ہسپتال میں99 میں سے 46 وینٹی لیٹرز خراب پائے گئے تھے۔ حکومت نے صورتحال بہتر بنانے کیلئے 2025 میں 200 نئے آئی سی یو وینٹی لیٹرز مختلف ٹرشری کیئر ہسپتالوں کو فراہم کئے جبکہ مزید500 آئی سی یو وینٹی لیٹرز کی خریداری کا عمل بھی شروع کیا گیا۔ پنجاب کے ترقیاتی پروگرام میں مزید150 آئی سی یو بیڈز کے ساتھ وینٹی لیٹرز اور ضروری آلات کی فراہمی کا منصوبہ بھی شامل ہے۔ وینٹی لیٹر کی عدم دستیابی یا خراب مشین کے باعث مریضوں کے لواحقین کو ایک ہسپتال سے دوسرے ہسپتال تک بھاگ دوڑ کرنا پڑتی ہے جبکہ انتہائی نگہداشت کے مریضوں میں بروقت علاج فیصلہ کن اہمیت رکھتا ہے۔