کراچی(بزنس رپورٹر)رواں مالی سال 2026-27 کے ابتدائی دو ماہ کے دوران پاکستان کی معیشت کے مختلف شعبوں میں بہتری کے نمایاں رجحانات سامنے آئے ہیں۔اعداد و شمار کے مطابق اگست میں پاکستان کا کرنٹ اکائونٹ خسارہ 70 فیصد کمی کے بعد 9 کروڑ 80 لاکھ ڈالر رہ گیا، جبکہ مالی سال کے پہلے دو ماہ کا مجموعی کرنٹ اکائو نٹ خسارہ بھی 36 فیصد کم ہوا۔بیرونی کھاتوں میں بہتری کے ساتھ بڑی صنعتوں کی پیداوار میں سالانہ بنیاد پر 3 فیصد جبکہ ماہانہ بنیاد پر 9.5 فیصد اضافہ ریکارڈ کیا گیا۔رواں مالی سال کے ابتدائی دو ماہ کے دوران نئی کمپنیوں کی رجسٹریشن میں 45 فیصد اضافہ ہوا اور رجسٹرڈ کمپنیوں کی مجموعی تعداد 3 لاکھ 12 ہزار تک پہنچ گئی۔اعداد و شمار کے مطابق جولائی اور اگست میں ترسیلات زر کی مجموعی آمد 7.3 ارب ڈالر رہی جبکہ ترسیلات زر میں سالانہ بنیاد پر 17 فیصد اضافہ ریکارڈ کیا گیا۔اس دوران خدمات کی برآمدات میں 29 فیصد، آئی ٹی برآمدات میں 17 فیصد اور فری لانسرز کی آمدن میں 42 فیصد اضافہ ہوا۔معاشی اشاریوں میں یہ تبدیلیاں کاروباری سرگرمیوں میں اضافے اور بیرونی کھاتوں میں بہتری کی نشاندہی کرتی ہیں۔
