پی ٹی آئی کے لانگ مارچ کا مقصد صحت سہولیات یا ملاقاتوں کی بحالی ہے تو مطالبات پورے کیے جائیں، میاں جاویدلطیف

شیخوپورہ (آئی این پی) مسلم لیگ (ن) کے مرکزی سینئر رہنما و سابق وفاقی وزیر میاں جاوید لطیف نے کہا ہے کہ تحریک انصاف کے لانگ مارچ کا مقصد اگر عمران خان کو صحت کی سہولیات فراہم کروانا یا ملاقاتوں کی بحالی کے لیے دبائو ڈالنا ہے تو حکومت کو لانگ مارچ کے نتیجے کا انتظار کرنے کے بجائے آئینی اور بنیادی حقوق سے متعلق یہ مطالبات پہلے ہی پورے کر دینے چاہئیں۔ تاہم اگر لانگ مارچ کے ذریعے اداروں اور عدالتوں پر دبائو ڈال کر دوبارہ گڈ ٹو سی یو کہلوانے کی کوشش کی جا رہی ہے تو اب نہ جنرل فیض حمید نظر آتے ہیں اور نہ جنرل باجوہ جبکہ 9 اور 10 مئی جیسی کسی سہولت کاری کی توقع بھی نہیں رکھنی چاہیے۔ اپنے ایک بیان میں میاں جاوید لطیف نے کہا کہ اگر احتجاج کا مقصد کسی فرد کے بنیادی حقوق اور صحت سے متعلق سہولیات کا حصول ہے تو حکومت کو معاملے کو سیاسی کشمکش بنانے کے بجائے قانون اور آئین کے دائرے میں رہتے ہوئے حل کرنا چاہیے۔ انہوں نے کہا کہ دوسری جانب کسی وفاقی وزیر کی طرف سے احتجاجی مارچ، جلسوں اور جلوسوں پر پابندی عائد کرنے کے لیے قانون سازی کی بات کرنا درست نہیں، ایسی قانون سازی آئین سے کھلواڑ کے مترادف ہوگی اور ملک کے مفاد میں بھی نہیں سابق وفاقی وزیر نے خیبر پختونخواہ حکومت پر بھی تنقید کرتے ہوئے کہا کہ اگر وزیراعلیٰ خیبر پختونخواہ پولیس کو سیاسی مقاصد کے لیے دبائو میں لا رہے ہیں تو یہ ان کے اپنے لیڈر کے ان دعوئوں کی نفی ہے جن میں پولیس کو غیر سیاسی اور مثالی پولیس بنانے کی بات کی جاتی رہی۔ انہوں نے کہا کہ حقیقت میں اس وقت بھی ایسا کچھ نہیں تھا جب اس حوالے سے دعوے اور بھاشن دیئے جاتے تھے۔