لاہور(کرائم رپورٹر)انسپکٹر جنرل پولیس پنجاب عبدالکریم پولیس ملازمین اور ان کے اہل خانہ کی ہیلتھ ویلفیئر کیلئے پرعزم ہیں جس کے تسلسل میں پولیس ملازمین اور ان کے اہل خانہ کے علاج معالجے کیلئے مزید 18 لاکھ روپے سے زائد فنڈز جاری کر دیئے گئے ہیں۔ترجمان پنجاب پولیس نے تفصیلات سے آگاہ کرتے ہوئے بتایا کہ ڈی ایس پی قدیر احمد کو اہلیہ کے علاج معالجے کیلئے اڑھائی لاکھ روپے کے فنڈز جاری کیے گئے ہیں جبکہ آفس سپرنٹنڈنٹ عابد حسین چیمہ کو بیوی کے علاج معالجے کیلئے 2 لاکھ 15 ہزار روپے فراہم کیے گئے ہیں۔ اسی طرح سب انسپکٹر محمد اکمل، وائرلیس کانسٹیبل عابد حسین اور لیڈی کانسٹیبل فرزانہ کوثر کو علاج معالجے کیلئے 2 لاکھ روپے فی کس فنڈز جاری کیے گئے ہیں۔ترجمان پنجاب پولیس نے مزید بتایا کہ ڈی ایس پی روف احمد، مرحوم کانسٹیبل عبدالغفور کی بیوہ، کانسٹیبلز مظہر عباس اور محمد سہیل کو علاج معالجے کیلئے ایک لاکھ روپے فی کس جاری کیے گئے ہیں۔ علاوہ ازیں کانسٹیبلز فرحان ریاض، بلال عاصم اور شاہد احمد کو علاج معالجے کی مد میں مجموعی طور پر 2 لاکھ 67 ہزار روپے جبکہ جونیئر کمپیوٹر آپریٹر محمد سہیل اور ڈیٹا انٹری آپریٹر حسن اقبال کو علاج معالجے کی مد میں مجموعی طور پر 95 ہزار روپے کے فنڈز جاری کیے گئے ہیں۔ آئی جی پنجاب عبدالکریم نے میڈیکل فنانشل اسسٹنس کمیٹی کی سکروٹنی کے بعد فنڈز کے اجراء کی منظوری دی۔ آئی جی پنجاب نے کہا کہ شہریوں کی جان و مال کے تحفظ میں مصروف عمل پولیس ملازمین اور ان کے اہل خانہ کی بہترین ویلفیئر اولین ترجیح ہے۔ انہوں نے مزید کہا کہ مختلف اداروں کے ساتھ ایم او یوز کے تحت بھی ملازمین اور ان کے اہل خانہ کو علاج معالجے کی بہترین سہولیات فراہم کر رہے ہیں۔
