نیپال کے ضلع مانانگ کے نار پھو علاقے میں واقع ہملنگ ہمال بیس کیمپ پر اتوار کی صبح برفانی تودہ گرنے سے کم از کم 10 افراد لاپتا ہوگئے۔ لاپتا افراد میں کوہ پیماؤں کے معاون عملے اور شیئرپا گائیڈز سمیت مہم سے وابستہ افراد شامل ہیں۔
ایکسپیڈیشن آپریٹرز ایسوسی ایشن نیپال کے مطابق ابتدائی طور پر 10 افراد سے رابطہ منقطع ہونے کی اطلاع ملی تھی، جن میں 8 افراد ہمالیئن ہالیڈیز نیپال اور 2 افراد امیجن نیپال سے وابستہ بتائے گئے ہیں۔ تاہم بعد کی مقامی رپورٹ میں لاپتا افراد کی تعداد 14 تک پہنچنے کی اطلاع دی گئی ہے، اس لیے صورتحال ابھی مکمل طور پر واضح نہیں۔
ہملنگ ہمال 7,126 میٹر بلند پہاڑ ہے اور تبت کی سرحد کے قریب واقع ہے۔ علاقے میں کئی روز سے مسلسل بارش اور شدید برفباری جاری تھی، جس کے باعث موسم پہلے ہی خراب تھا اور متعدد کوہ پیمائی ٹیمیں پہاڑی ڈھلوانوں سے نیچے محفوظ مقامات کی جانب منتقل ہوگئی تھیں۔
