پی ایس ڈبلیو کا لمز میں خدیجہ پروگرام کے تحت خواتین کیلئے رہنمائی سیشن

اسلام آباد(نامہ نگار خصوصی )پاکستان سنگل ونڈو (پی ایس ڈبلیو) نے پاکستان میں کاروباری سرگرمیوں اور جدت کے فروغ کے لیے کام کرنے والے لمز سینٹر فار انٹرپرینیورشپ (ایل سی ای) کے تعاون سے اپنے خدیجہ ویمن انٹرپرینیورشپ پروگرام کے تحت خواتین کے لیے رہنمائی اور تربیتی سیشن کا انعقاد کیا۔لمز کیمپس میں ایل سی ای کے  آڈیٹوریم میں منعقدہ سیشن میں کاروبار شروع کرنے کی خواہش رکھنے والی خواتین، جامعات کے نمائندوں اور کاروباری شعبے سے وابستہ ماہرین نے شرکت کی۔ سیشن کا مقصد خواتین کے کاروباری سفر کو آگے بڑھانے، ڈیجیٹل تجارت سے جڑنے اور خواتین کی قیادت میں چلنے والے کاروبار کو وسعت دینے کے لیے عملی رہنمائی فراہم کرنا تھا۔تعلیمی صلاحیتوں کو عملی کاروباری تجربے سے جوڑنے کے لیے سیشن میں معروف کاروباری شخصیات اور ماہرین نے عملی مشورے اور تجربات پیش کیے۔ لاما کی بانی اور ڈائریکٹر آسیہ سائل خان، پرونٹو اسپیسز کی بانی صولت صلاح الدین اور ویمن چیمبر آف کامرس اینڈ انڈسٹری (ڈبلیو سی سی آئی) لاہور کی بانی شہلا جاوید اکرم نے بطور اہم رہنما شرکت کی۔سیشن میں لمز میں انٹرپرینیورشپ اور انوویشن کی ایسوسی ایٹ پروفیسر ڈاکٹر شہریار شاہد نے کاروباری سرگرمیوں سے متعلق خصوصی تربیت بھی فراہم کی۔ اس موقع پر ایل سی ای کے ذریعے نئے کاروباری منصوبوں کے قیام اور ان کی ترقی میں تعلیمی اداروں کی جانب سے فراہم کی جانے والی معاونت اور منظم رہنمائی کی اہمیت کو اجاگر کیا گیا۔ مقررین نے مارکیٹ کے حالات کو سمجھنے، مضبوط برانڈ شناخت بنانے، ڈیجیٹل پلیٹ فارمز سے فائدہ اٹھانے اور کاروبار کو پائیدار انداز میں آگے بڑھانے کے حوالے سے اپنے عملی تجربات شیئر کیے۔ان کی جانب سے دی گئی رہنمائی نے ابھرتی ہوئی کاروباری خواتین کو پاکستان کے بدلتے معاشی ماحول میں کاروباری رکاوٹوں سے نمٹنے اور اپنے منصوبوں کو وسعت دینے کے حوالے سے اہم معلومات فراہم کیں۔ تجارت میں خواتین کی شمولیت کو فروغ دینے کے پی ایس ڈبلیو کے مشن کے تحت خدیجہ پروگرام کا دائرہ اہم تعلیمی اداروں اور صنعتی مراکز تک بڑھایا جا رہا ہے۔ عالمی سطح پر تجارت میں صنفی مساوات کے لیے ڈبلیو ٹی او گلوبل ایوارڈ حاصل کرنے والے اس پروگرام کے ذریعے تجارتی سہولت کاری کو عملی رہنمائی کے ساتھ جوڑا جا رہا ہے، تاکہ کاروباری خواتین کو عالمی سطح پر کام کرنے کے لیے تکنیکی معلومات، قواعد و ضوابط کی سمجھ اور ڈیجیٹل مہارتیں فراہم کی جا سکیں۔ یہ پروگرام جامعات میں موجود باصلاحیت افراد کو کاروباری شعبے سے وابستہ تجربہ کار شخصیات سے جوڑ کر ایسا ماحول فراہم کرتا ہے جہاں نئے اور تخلیقی خیالات کو قابلِ توسیع اور تجارتی بنیادوں پر کامیاب کاروبار میں تبدیل کیا جا سکے۔نوجوان کاروباری خواتین کے لیے رہنمائی کی اہمیت پر بات کرتے ہوئے پی ایس ڈبلیو کے چیف ایگزیکٹو آفیسر سید آفتاب حیدر نے کہا، ” نوجوان خواتین کو کامیاب کاروباری سفر کے لیے تیار کرنے کے لیے صرف تکنیکی سہولتیں کافی نہیں بلکہ بامقصد رہنمائی اور کاروباری دنیا کا عملی تجربہ بھی ضروری ہے۔خدیجہ پروگرام کے تحت لمز میں ہماری سرگرمی اس عزم کی عکاسی کرتی ہے کہ ہم ابھرتی ہوئی خواتین رہنماں کو تجربہ کار کاروباری شخصیات سے جوڑ کر کاروباری ترقی کے مواقع پیدا کر رہے ہیں۔ طلبہ کو مارکیٹ کے عملی تجربات سے روشناس کرا کے ہم پاکستان کے تجارتی نظام کے لیے ایک جامع اور ٹیکنالوجی پر مبنی بنیاد قائم کر رہے ہیں۔” ایل سی ای کے ڈائریکٹر جاذب ظہیر نے کاروباری سرگرمیوں کے ذریعے جامع معاشی ترقی کے لیے ادارے کے عزم کا اظہارکرتے ہوئے کہا، "ہم خدیجہ پروگرام کے لیے پاکستان سنگل ونڈو کے ساتھ اس شراکت داری کو اہم سمجھتے ہیں کیونکہ اس سے ہمارے نصاب میں عملی پہلوں کو شامل کرنے کی کوششوں کو مزید تقویت ملتی ہے۔ کاروباری سوچ، ڈیجیٹل مہارتیں، مصنوعات اور مارکیٹ کے درمیان مطابقت اور کاروبار کو وسعت دینے کی صلاحیت جدید ملازمتوں میں کامیابی کے لیے انتہائی اہم ہیں۔ کاروباری شخصیات اور انٹرپرینیورشپ کے ماہرین سے براہِ راست رابطہ کاروباری خواتین کی حوصلہ افزائی کرتا ہے کہ وہ یہ مہارتیں حاصل کریں اور اپنے خیالات کو عملی شکل دیں۔”پاکستان سنگل ونڈو تعلیمی اداروں اور کاروباری شعبے کے اہم اداروں کے ساتھ جاری شراکت داری کے ذریعے ملک بھر میں خواتین کے کاروبار کے لیے معاون نظام کو مزید مضبوط بنا رہا ہے۔ عملی رہنمائی، ڈیجیٹل تجارت کی سمجھ اور قیادت کی تربیت کو اپنی سرگرمیوں کا حصہ بنا کر خدیجہ پروگرام جامع معاشی ترقی اور کاغذ سے پاک تجارت کے فروغ میں اہم کردار ادا کر رہا ہے۔