ٹیکسلا منشیات فروشی عام ، جرائم کی شرح میں اضافہ،شہری پریشان

ٹیکسلا(نمائندہ خصوصی) ٹیکسلا اور اس گردونواح کے علاقوں میں منشیات فروشی کی لعنت اس قدر عام ہو چکی ہے کہ اس نے معاشرے کے تانے بانے بکھیر کر رکھ دیے ہیں، اور اس بڑھتے ہوئے ناسور کے باعث شہر بھر میں جرائم کی شرح میں بھی ہوشربا اضافہ ریکارڈ کیا جا رہا ہے۔ عوامی حلقوں کی جانب سے بار بار کی جانے والی شکایات اور مطالبات کے پیش نظر حال ہی میں نئے ایس ایچ او کی تعیناتی عمل میں لائی گئی تھی تاکہ پولیس کی کارکردگی کو بہتر بنا کر جرائم کا قلع قمع کیا جا سکے، تاہم افسوسناک امر یہ ہے کہ یہ تقرری بھی منشیات کے خاتمے کے حوالے سے بالکل کارگر ثابت نہیں ہو سکی اور پولیس کے اعلی حکام کی جانب سے منشیات کے مکمل خاتمے کے تمام دعوے دھرے کے دھرے کے دھرے رہ گئے ہیں۔ زمینی حقائق یہ ہیں کہ قانون نافذ کرنے والے اداروں کی مبینہ غفلت یا چشم پوشی کے باعث شہر کے متعدد اہم اور گنجان آباد علاقے منشیات فروشی کا باقاعدہ گڑھ بن چکے ہیں، جن میں محلہ مکراں اور موہڑہ شاہ ولی شاہ سرفہرست ہیں، جہاں دن دہاڑے اور سرعام آئس جیسی مہلک اور زہریلی منشیات کی کھلے عام خرید و فروخت جاری ہے، جس سے جرائم پیشہ عناصر کے حوصلے مزید بلند ہو رہے ہیں۔ منشیات کی اس سفاکانہ تجارت کی سنگینی کا اندازہ اس بات سے بخوبی لگایا جا سکتا ہے کہ کچھ عرصہ قبل ریلوے پھاٹک جیسے حساس اور مصروف مقام پر سرعام منشیات فروشی کی جانے والی ویڈیوز بھی وائرل ہو چکی ہیں، جن نے مقامی انتظامیہ اور پولیس کی کارکردگی پر شدید سوالیہ نشان کھڑے کر دیے ہیں، لیکن اس کے باوجود مجرموں کے خلاف کوئی ٹھوس اور عبرت ناک کارروائی عمل میں نہیں لائی گئی۔ منشیات کی اس آسان دستیابی اور فراوانی نے شہر کی قیمتی نوجوان نسل کو تباہی کے دہانے پر لا کھڑا کیا ہے، اور درجنوں نوجوان اس زہر کی لپیٹ میں آ کر اپنی صحت اور مستقبل دونوں برباد کر رہے ہیں، جس سے والدین میں شدید ترین تشویش، خوف اور بے چینی پائی جاتی ہے۔ اس سنگین اور تشویشناک صورتحال کے پیش نظر سماجی حلقوں، شہریوں اور متاثرہ خاندانوں نے آئی جی پنجاب سے پرزور اپیل کی ہے کہ وہ اس معاملے کا فوری طور پر سخت نوٹس لیں، ٹیکسلا میں منشیات فروشی کی پشت پناہی کرنے والے عناصر اور ڈیلروں کے خلاف بلا امتیاز گرینڈ آپریشن کا حکم دیں، اور غفلت برتنے والے مقامی پولیس حکام کے احتساب کو یقینی بناتے ہوئے اس شہر کو تباہی سے بچائیں تاکہ نوجوان نسل کو محفوظ مستقبل دیا جا سکے