بیجوں پر تحقیق ،نئی اقسام متعارف کرانے پر خصوصی توجہ مرکوز ہے: پی ایس سی

لاہور (این این آئی) پنجاب سیڈ کارپوریشن کے ترجمان نے کہا ہے کہ معیاری، تصدیق شدہ اور بہتر پیداواری صلاحیت رکھنے والے بیجوں کی فراہمی سے زرعی پیداوار میں نمایاں اضافہ ممکن ہے، کسان معیاری بیج کے استعمال کو ترجیح دیں جس سے ان کی پیداوار بھی بہتر ہو گی ۔ اپنے بیان میں ترجمان پنجاب سیڈ کارپوریشن نے کہا کہ کسانوں کو مختلف فصلوں کے تصدیق شدہ معیاری بیج مناسب نرخوں پر فراہم کرنے کے لئے ہر ممکن اقدامات اٹھائے جارہے ہیں۔ جدید زرعی تقاضوں کے مطابق بیجوں کے معیار کو بہتر بنانا وقت کی اہم ضرورت ہے، اس سلسلے میں تحقیق اور نئی اقسام متعارف کرانے پر توجہ دی جا رہی ہے۔ انہوں نے کہا کہ ناقص اور غیر معیاری بیج کسانوں کی محنت اور سرمایہ دونوں کو متاثر کرتے ہیں اس لئے غیر تصدیق شدہ بیجوں کے استعمال سے گریز کیا جائے۔ ترجمان پنجاب سیڈ کارپوریشن نے کہا کہ موسمی حالات کو مدنظر رکھتے ہوئے زیادہ پیداوار دینے والی اقسام کے فروغ پر خصوصی توجہ دی جارہی ہے۔ کسان بروقت بیج حاصل کرکے فصل کی بوائی مقررہ شیڈول کے مطابق کریں تاکہ بہتر پیداوار حاصل ہو سکے۔ زرعی شعبے کی ترقی براہ راست ملکی معیشت اور غذائی تحفظ سے وابستہ ہے۔ کسانوں کو معیاری بیج کے انتخاب اور جدید زرعی طریقوں کے حوالے سے آگاہی فراہم کرنے کا سلسلہ بھی جاری ہے۔