آئی جی پنجاب کا کمالیہ میں ریڑھی بان خاتون کو جوتا مارنے کا سخت نوٹس

لاہور (کرائم رپورٹر) انسپکٹر جنرل پولیس پنجاب عبدالکریم نے کمالیہ میں ایس ایچ او کی جانب سے ریڑھی بان خاتون کو جوتا مارنے کی ویڈیو وائرل  ہونے کے معاملے کا سخت نوٹس لیتے ہوئے کارروائی کے احکامات جاری کیے۔ آئی جی پنجاب کے حکم پر ایس ڈی پی او سرکل کمالیہ کی مدعیت میں سب انسپکٹر عمران غفور کے خلاف مقدمہ درج کرکے اسے گرفتار کر لیا گیا۔ آئی جی پنجاب نے کہا کہ وزیر اعلی پنجاب مریم نواز شریف کے ویژن کے تحت خواتین کے ساتھ بدسلوکی اور تشدد پر زیرو ٹالرنس ہے۔ اختیارات سے تجاوز اور شہریوں سے بدسلوکی کے مرتکب ذمہ داران کسی رعایت کے مستحق نہیں، ان کے خلاف سخت کارروائی عمل میں لائی جائے گی۔ ترجمان پنجاب پولیس نے بتایا کہ ریڑھی بان خاتون سے ناروا سلوک کے مرتکب سب انسپکٹر کو پہلے ہی معطل کرکے محکمانہ انکوائری عمل میں لائی جارہی ہے۔ سب انسپکٹر عمران غفور تھانہ صدر کمالیہ میں ایس ایچ او تعینات تھا۔15 کی کال پر سب انسپکٹر نے مل فتیانہ کے علاقے میں عوام الناس کی موجودگی میں چوری کے شبے میں ریڑھی بان خاتون پر جوتے سے تشدد کیا تھا۔ علاوہ ازیں انسپکٹر جنرل پولیس پنجاب عبدالکریم نے خوشاب کے علاقہ راجڑ میں سابقہ دشمنی پر دو گروپوں میں فائرنگ سے 2 افراد کے جاں بحق اور 6 کے زخمی ہونے کے معاملے کا نوٹس لیتے ہوئے آر پی او سرگودھا سے رپورٹ طلب کر لی ہے۔ آئی جی پنجاب نے ڈی پی او خوشاب کو فائرنگ میں ملوث ملزمان کی فوری گرفتاری کے احکامات جاری کرتے ہوئے کہا کہ ملزمان کی گرفتاری کے لیے تمام وسائل بروئے کار لائے جائیں۔ ترجمان پنجاب پولیس نے بتایا کہ سینئر پولیس افسران اور فرانزک ٹیموں نے موقع پر پہنچ کر شواہد اکٹھے کر لیے ہیں۔ ڈی پی او خوشاب نے کہا کہ ملزمان کی گرفتاری کے لیے ٹیمیں تشکیل دے دی گئی ہیں اور جلد گرفتار کر لیا جائے گا۔مقتولین میں نعیم شاہ اور شہباز بھٹی شامل ہیں۔