خواتین کے تحفظ کیلئے شہرکی80ہزار پبلک ٹرانسپورٹ میں کیو آرپینک بٹن نصب

لاہور (این این آئی) وزیراعلیٰ پنجاب مریم نواز کی خصوصی ہدایات پر لاہور میں رکشوں، رائیڈ ہیلنگ سروسز کی گاڑیوں اور پبلک ٹرانسپورٹ میں کیو آر پینک بٹن نصب کرنے کا عمل جاری ہے۔ سی ٹی او لاہور کے مطابق اب تک 80 ہزار رکشوں،  رائیڈ ہیلنگ سروسز کی کیبز اور پبلک ٹرانسپورٹ میں کیو آر پینک بٹن کی تنصیب کی جا چکی ہے جبکہ شہر کے 45 مختلف مقامات پر ٹریفک ٹیمیں یہ سہولت فراہم کر رہی ہیں۔ سی ٹی او کے مطابق پبلک ٹرانسپورٹ کو قانونی دائرے میں لانے اور شہریوں کے تحفظ کے پیش نظر کیو آر پینک بٹن لازم قرار دیا گیا ہے۔ خواتین ہراسانی یا کسی ہنگامی صورتحال کی صورت میں کیو آر پینک کوڈ کے ذریعے فوری مدد کے لیے رابطہ کرسکیں گی۔ کیو آر پینک بٹن کی تنصیب کے لیے ہر ٹریفک سیکٹر میں ٹیم موجود ہے جبکہ رکشوں کے لیے 12 علیحدہ ٹیمیں بھی مختص کی گئی ہیں۔ سی ٹی او لاہور نے بتایا کہ مختلف رکشہ یونینز کے مطالبے پر 4 نئے لائسنس سینٹرز بھی قائم کیے گئے ہیں۔ سید عبدالرحیم شیرازی کے مطابق سمارٹ ٹریفک مینجمنٹ اور جدید سکیورٹی فیچرز کے فروغ کو یقینی بنایا جا رہا ہے، جبکہ سیفٹی اور سکیورٹی فیچرز اختیار نہ کرنے والی آن لائن کیب سروسز کے خلاف کارروائی کا حتمی فیصلہ کرلیا گیا ہے۔