پنجاب ویمن پروٹیکشن اتھارٹی اور پنجاب فرانزک سائنس اتھارٹی کے درمیان اہم مفاہمتی یادداشت پر دستخط

لاہور (این این آئی) پنجاب ویمن پروٹیکشن  اتھارٹی اور پنجاب فرانزک سائنس اتھارٹی کے درمیان اہم مفاہمتی یادداشت پر دستخط کیے گئے۔ مفاہمتی یادداشت پر چیئرپرسن پنجاب ویمن پروٹیکشن اتھارٹی حنا پرویز بٹ اور ڈی جی پنجاب فرانزک سائنس اتھارٹی ڈاکٹر محمد امجد نے دستخط کیے۔ جس کے تحت خواتین کے خلاف جرائم میں فرانزک شواہد کے موثر تحفظ اور انصاف کے نظام کو مضبوط بنانے کے لیے ادارہ جاتی تعاون مزید بڑھانے پر اتفاق کیا گیا ہے۔ اس موقع پر حنا پرویز بٹ نے کہا کہ فرانزک آگاہی، شواہد کے تحفظ اور افسران کی استعداد کار بڑھانے کے لیے مشترکہ اقدامات کیے جائیں گے۔ ضلعی اور فرنٹ لائن ویمن پروٹیکشن افسران کی فرانزک شواہد سے متعلق تربیت اور آگاہی پر خصوصی توجہ دی جائے گی۔ انہوں نے کہا کہ فرانزک شواہد خواتین کے خلاف تشدد کے کیسز میں موثر انصاف کے لیے اہم ہیں، مفاہمتی یادداشت کا مقصد فرانزک آگاہی اور شواہد کے موثر انتظام کو مزید مضبوط بنانا ہے۔ اس موقع پر ڈی جی پی ایف ایس اے ڈاکٹر محمد امجد نے کہا کہ جرم کے بعد ابتدائی 24 گھنٹے شواہد کے تحفظ کے لیے انتہائی اہم ہیں، فرانزک سائنس اتھارٹی انصاف کے عمل میں اہم کردار ادا کرتی ہے۔