4ماہ قبل خاتون کاشوہر سونا لوٹ کر فرار ڈی آئی جی کے سونا ریکوری کے احکامات

لاہور(کرائم رپورٹر)شادی شدہ خاتون کا شوہر چار ماہ قبل سونا لوٹ کر فرارہوگیا۔ خاتون اپنا مسئلہ لے کر ڈی آئی جی آپریشنز کی کھلی کچہری میں پہنچ گئی۔ڈی آئی جی آپریشنز فیصل کامران نے ایس ایچ او بادامی باغ کو خاتون کے زیورات7دن کے اندر واپس دلوانے کا حکم دے دیا۔ اسی طرح موٹر سائیکل چوری مقدمہ درج ہونے کے باوجودموٹر سائیکل نہ ملنے کی شکایت پر ایس ایچ او گڑھی شاہو کو موٹرسائیکل تلاش کرنے کی ہدایت کی گئی۔ خاتون سائلہ پرشوہرکی وفات کے بعد دوسری بیوی کے بچوں کی جانب سے تشدد کی شکایت پر ایس ایچ او باغبانپورہ کو معاملہ حل کرانے کا حکم دیا گیا۔ ڈی آئی جی آپریشنز نے شہری کو مقدمے سے دستبرداری کے لیے دھمکیوں کی شکایت پر ایس ایچ او بادامی باغ کو شہری کو تحفظ فراہم کرنے کا حکم دیا۔ خاتون سائلہ کی سسرالیوں پرجہیز واپسی کی ڈیمانڈ پرخاتون پر ہی چوری کا الزام لگانے کی شکایت پر ایس ایچ اومصطفی آباد کو معاملے کی تصدیق، حل کروانے کی ہدایت کی گئی۔ فیصل کامران نے کہا کہ شہری مسائل کے حل کے لیے روزانہ دوپہر 1 سے 3 بجے تک کھلی کچہری سے رجوع کریں۔ اتوار کو دوپہر 12 بجے فیس بک لائیو کے ذریعے بھی شکایات درج کرائی جا سکتی ہیں۔