رائس ایکسپورٹرز ایسوسی ایشنکے زیراہتمام ایکسپورٹ ایوارڈز کی تقریب

کراچی (بزنس رپورٹر) رائس ایکسپورٹرز ایسوسی ایشن آف پاکستان (ریپ) کے زیر اہتمام  ایکسپورٹ ایوارڈز کی تقریب منعقد ہوئی، جس میں چاول کی برآمدات کے فروغ، ملکی معیشت میں اہم کردار ادا کرنے اور عالمی منڈی میں پاکستانی چاول کی شناخت بہتر بنانے کے لیے نمایاں خدمات انجام دینے والے ایکسپورٹرز کو اعزازات سے نوازا گیا۔ تقریب میں چیئرمین سینیٹ سید یوسف رضا گیلانی نے بطور مہمان خصوصی شرکت کی اور معروف رائس ایکسپورٹر رفیق سلیمان کو ان کی خدمات کے اعتراف میں ایکسپورٹ ایوارڈ پیش کیا۔اس موقع پر رائس ایکسپورٹرز ایسوسی ایشن آف پاکستان کے سرپرست اعلیٰ رحیم جانو بھی موجود تھے۔ تقریب میں چاول کی صنعت سے وابستہ شخصیات، معروف برآمد کنندگان، کاروباری رہنمائوں اور دیگر نمائندوں نے شرکت کی۔ مقررین نے کہا کہ پاکستان چاول پیدا کرنے والے اہم ممالک میں شامل ہے اور چاول کی برآمدات ملکی زرمبادلہ کے حصول میں اہم کردار ادا کرتی ہیں، تاہم عالمی منڈی میں مسابقت برقرار رکھنے کے لیے معیار، پیداوار، جدید ٹیکنالوجی اور برآمدی سہولتوں پر مزید توجہ دینے کی ضرورت ہے۔ تقریب سے خطاب کرتے ہوئے سابق وزیراعظم یوسف رضا گیلانی نے رائس ایکسپورٹرز ایسوسی ایشن آف پاکستان (REAP) کی تقریب سے خطاب کرتے ہوئے کہا کہ پاکستان کی برآمدات میں اضافے کے لیے کردار ادا کرنے والے ایکسپورٹرز ملک کے حقیقی ہیروز ہیں۔ انہوں نے REAP کے اٹھارویں کامیاب انعقاد پر منتظمین اور ایکسپورٹرز کو مبارکباد پیش کی۔یوسف رضا گیلانی نے کہا کہ زراعت پاکستان کی معیشت کی ریڑھ کی ہڈی ہے اور پاکستانی چاول کی دنیا بھر میں نمایاں مانگ موجود ہے۔ چاول کی برآمدات میں مزید اضافے کے لیے ویلیو ایڈیشن پر توجہ دینا ضروری ہے تاکہ عالمی منڈی میں پاکستانی مصنوعات کی قدر اور رسائی بڑھائی جاسکے۔انہوں نے ایکسپورٹرز کی حوصلہ افزائی کے لیے ہر سال ایوارڈز کے انعقاد کی REAP کی روایت کو بھی سراہا۔ دوسری جانب شرکاء نے کہا کہ پاکستانی رائس ایکسپورٹرز عالمی سطح پر اپنی مصنوعات متعارف کرا رہے ہیں اور مختلف ممالک میں پاکستانی چاول کی مانگ میں اضافے کے لیے مسلسل کوششیں جاری ہیں۔ انہوں نے کہا کہ حکومت اور متعلقہ اداروں کے تعاون سے چاول کی صنعت کو درپیش مسائل حل کرکے برآمدات میں مزید اضافہ کیا جا سکتا ہے۔ تقریب کے اختتام پر نمایاں کارکردگی کا مظاہرہ کرنے والے ایکسپورٹرز میں ایوارڈز تقسیم کیے گئے۔