پی ٹی آئی لانگ مارچ پنجاب پولیس کے ہزاروں اہلکاروں کو اسلام آباد بلوا کر بھوکا پیاسا چھوڑ دیا گیا

ملتان ( کرائم رپورٹر) ملتان سمیت صوبہ بھر سے تحریک انصاف کے احتجاج کو پیش نظر پنجاب پولیس کی بھاری نفری اسلام آباد اور اس کے ارد گرد کے اضلاع میں تعینات ہوئے ایک ہفتہ سے زائد وقت گزر چکا ہے لیکن آج بھی ہزاروں کی تعداد میں تعینات پولیس ملازمین رہائش ، کھانے ، پانی سمیت دیگر مناسب سہولیات نہ ملنے سے شدید پریشانی کا شکار ہیں، تین وقت کا کھانا نہ ملنے اور مناسب نیند نہ ہونے کی وجہ سے پولیس ملازمین میں بے چینی پھیل رہی ہے، کئی پولیس ملازمین تو سوشل میڈیا پر ناقص کھانے کی شکایت کرتے ہوئے بھی نظر آئے ہیں، تفصیلات کے مطابق تحریک انصاف کے احتجاج کے لیے ملتان سے 2300 سے زائد افسران و اہلکار ڈیوٹی پر گئے اور صوبہ بھر سے تقریبا 30 ہزار کے لگ بھگ افسران و جوان 21 سے 23 ستمبر کے درمیان اپنی ڈیوٹی پر پہنچے ، بیشتر اہلکاروں کو سرکاری سکولوں یا شادی ہالوں میں ٹھہرایا گیا ہے، ڈیوٹی پر گئے بیشتر اہلکاروں نے سونے اور واش رومز کی سہولیات مناسب نہ ہونے کی شکایت کرتے رہے ہیں جبکہ بیشتر اہلکاروں نے مناسب کھانا نہ ملنے تک کا بھی شکوہ کیا ہے ، جبکہ ان کو کھانے میں زیادہ تر دال چاول ہی بھجوائے جا رہے ہیں اور کئی مقامات پر تو دن میں صرف ایک بار ہی کھانا فراہم کیا گیا ہے، جس کی وجہ سے پولیس اہلکاروں میں بے چینی کی سی کیفیت ہے اور وہ مناسب رہائشی سہولت نہ ملنے کی وجہ سے تھکاوٹ کا شکار بھی ہو رہے ہیں، ذرائع نے بتایا ہے کہ افسران نے اہلکاروں کے تھکنے کے احساس پر گذشتہ روز سے اعلان کیا ہے کہ وہ 24 گھنٹے کے لیے گھروں پر چھٹی کے لیے جا سکتے ہیں، اس سہولت کو کئی اہلکاروں نے استعمال بھی کیا ہے لیکن پولیس اہلکاروں کا کہنا ہے کہ اگر اتنی بڑی تعداد میں نفری جب منگوائی جا رہی تھی تو انتظامات بھی اسی سطح کے کیے جاتے تاکہ بنیادی سہولیات تو مل پاتیں، جبکہ ذرائع نے یہ بھی بتایا ہے کہ اضلاع میں کرائم کی شرح بڑھنے کے اندیشہ کے پیش نظر ایلیٹ فورس کو واپس اضلاع میں رپورٹ کرنے کا حکم بھی دیا گیا ہے تاہم ضرورت پڑنے پر انہیں دوبارہ بھی طلب کیا جا سکتا ہے۔
پولیس اہلکار