لاہور(کرائم رپورٹر)اے این ایف نے تعلیمی اداروں کے اطراف سمیت ملک کے مختلف شہروں
میں منشیات اسمگلنگ کے خلاف کریک ڈان کرتے ہوئے 7 کارروائیوں کے دوران 11 ملزمان کو گرفتار کر لیا۔ کارروائیوں کے دوران 85 لاکھ روپے سے زائد مالیت کی مجموعی طور پر 34.317 کلوگرام منشیات برآمد کی گئی۔ترجمان اے این ایف کے مطابق جی ٹی روڈ راولپنڈی میں یونیورسٹی کے قریب کارروائی کے دوران ملزم کے قبضے سے 1.4 کلوگرام چرس برآمد ہوئی، جبکہ گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف کیا۔دیگر کارروائیوں میں اسلام آباد ایئرپورٹ پر ریاض جانے والے مسافر کی واسکٹ سے 1.072 کلوگرام آئس، ملتان ایئرپورٹ پر شارجہ جانے والے مسافر کے بیگ سے 745 گرام وزنی 1080 ایکسٹیسی گولیاں برآمد کر کے دونوں ملزمان کو گرفتار کیا گیا۔فیض آباد بس ٹرمینل کے قریب گیزر میں چھپائی گئی 12 کلوگرام چرس برآمد کر کے ملزم کو گرفتار کیا گیا، جبکہ ہیڈ محمد والا انٹرچینج ملتان کے قریب گاڑی سے 10 کلوگرام آئس برآمد کر کے 2 ملزمان کو گرفتار کیا گیا۔ظفروال روڈ سیالکوٹ کے قریب موٹر سائیکل سوار ملزم سے 6.5 کلوگرام چرس اور پسٹل برآمد کیا گیا۔ چونگی نمبر 26 اسلام آباد کے قریب گاڑی سے 1.4 کلوگرام افیون، 1.2 کلوگرام چرس اور بھاری مقدار میں غیر قانونی اسلحہ برآمد کر کے 4 ملزمان کو گرفتار کیا گیا۔ترجماناے این ایف کے مطابق تمام کارروائیوں کے مقدمات انسداد منشیات ایکٹ 1997 کے تحت درج کر کے مزید تحقیقات کا آغاز کر دیا گیا ہے۔
