اسلام آباد میں ہائی پروفائل چوری کا ڈراپ سین

اسلام آباد (سٹاف رپورٹر)وفاقی دارالحکومت کے پوش سیکٹر ایف ایٹ تھری میں نواب آف بہاولپور کے خاندان کی رہائش گاہ سے قیمتی تاریخی نوادرات اور دیگر بیش قیمت اشیا کی چوری کی واردات کا ڈراپ سین ہو گیا، اسلام آباد پولیس نے کارروائی کرتے ہوئے واردات میں مبینہ طور پر ملوث چھ ملزمان کو گرفتار کر لیا۔ پولیس کے مطابق گرفتار ملزمان کے قبضے سے چوری شدہ سامان کا بڑا حصہ برآمد کیا گیا ہے، جبکہ باقی ماندہ مال مسروقہ کی بازیابی اور واقعے میں دیگر ممکنہ سہولت کاروں کا سراغ لگانے کے لیے تفتیش جاری ہے۔اسلام آباد پولیس کے مطابق تھانہ مارگلہ کی پولیس ٹیم نے جدید ٹیکنالوجی، سیف سٹی کیمروں کی فوٹیج اور انسانی ذرائع سے حاصل ہونے والی معلومات کی مدد سے واردات کا سراغ لگایا۔ کارروائی کے دوران چھ ملزمان کو گرفتار کیا گیا۔ پولیس حکام کا کہنا ہے کہ ملزمان کے خلاف قانونی کارروائی جاری ہے اور تفتیش کا دائرہ مزید وسیع کیا جا رہا ہے۔واقعہ نواب آف بہاولپور کے خاندان سے تعلق رکھنے والے پرنس بہاول عباس خان عباسی کی سیکٹر ایف ایٹ تھری میں واقع رہائش گاہ پر پیش آیا، جو سابق نواب صلاح الدین عباسی کے صاحبزادے ہیں۔ یکم اکتوبر کو گھر کے اسٹور روم میں توڑ پھوڑ اور سامان غائب ہونے کا انکشاف ہوا، جس کے بعد پولیس کو اطلاع دی گئی اور چوری کا مقدمہ درج کرکے تحقیقات شروع کر دی گئیں۔مقدمے کے مطابق چوری ہونے والی اشیا میں چاندی کی تخت نما کرسی، چاندی کی سیڑھی، چاندی کے پیالے، تاریخی مجسمے، سونے کی پلیٹیں، بہاولپور ریاست کے نشان والی قیمتی اشیا اور ایک بڑا تاریخی چاندی کا فریم شامل ہیں۔ اس کے علاوہ سابق ریاست بہاولپور سے منسوب قدیم بندوقیں اور تلواریں بھی غائب ہونے والی اشیا میں شامل بتائی گئی ہیں۔ یہ نوادرات مالی قدر کے ساتھ تاریخی اور ثقافتی اہمیت بھی رکھتے ہیں۔ابتدائی اطلاعات میں چوری ہونے والے نوادرات اور قیمتی اشیا کی مالیت تقریبا دو کروڑ روپے بتائی گئی تھی، تاہم 13 اکتوبر کو سامنے آنے والی رپورٹ میں گرفتار ملزمان سے سات کروڑ روپے سے زائد مالیت کا مسروقہ سامان برآمد ہونے کی اطلاع دی گئی ہے۔ پولیس کی جانب سے برآمد شدہ اشیا کی مکمل فہرست اور مالیت کی تفصیلی وضاحت سامنے آنے کے بعد ہی اس حوالے سے حتمی صورت حال واضح ہو سکے گی۔اس سے قبل اسلام آباد پولیس نے بتایا تھا کہ چوری شدہ سامان کا تقریبا 70 سے 80 فیصد حصہ برآمد کر لیا گیا ہے۔ پولیس حکام کے مطابق باقی ماندہ اشیا کی بازیابی کے لیے کوششیں جاری ہیں، جبکہ اس پہلو کا بھی جائزہ لیا جا رہا ہے کہ آیا واردات میں گرفتار افراد کے علاوہ مزید کوئی شخص یا سہولت کار ملوث تھا۔ایس ایس پی آپریشنز اسلام آباد قاضی علی رضا کے مطابق شہریوں کے قیمتی اثاثوں کو نشانہ بنانے والے جرائم پیشہ عناصر کے خلاف بلاامتیاز کارروائیاں جاری ہیں۔ ان کا کہنا ہے کہ گرفتار ملزمان کے خلاف قانونی تقاضے پورے کیے جائیں گے اور مزید برآمدگی کے لیے تمام دستیاب وسائل بروئے کار لائے جا رہے ہیں۔پولیس نے اس مقدمے میں چوری شدہ تاریخی نوادرات کی بازیابی کو اہم پیش رفت قرار دیا ہے، کیونکہ ان اشیا کی اہمیت محض مالی مالیت تک محدود نہیں بلکہ ان کا تعلق سابق ریاست بہاولپور کے تاریخی ورثے سے بھی ہے۔ باقی ماندہ سامان کی بازیابی اور مقدمے کی تفتیش مکمل ہونے کے بعد واردات کے تمام پہلوں سے متعلق مزید تفصیلات سامنے آنے کا امکان ہے۔