لاڑکانہ میں رائس کینال میں ڈوب کر 9 سالہ بچہ جاں بحق، دو کو بچالیا گیا

لاڑکانہ (این این آئی) رائس کینال میں نہاتے ہوئے تین بچے ڈوب گئے، جن میں سے دو کو علاقہ
مکینوں نے بچا لیا جبکہ ایک بچہ جاں بحق ہوگیا۔ واقعہ شہر میں عمرانی پل کے قریب پیش آیا جہاں ممتاز کالونی کے رہائشی تین بچے رائس کینال میں نہا رہے تھے کہ اچانک ڈوبنے لگے۔ بچوں کی چیخ و پکار سن کر علاقہ مکین موقع پر پہنچے اور دو بچوں کو بحفاظت نکال لیا تاہم تیسرے بچے کا سراغ نہ ملنے پر ریسکیو 1122 کو اطلاع دی گئی۔ ریسکیو ٹیم نے کارروائی کرتے ہوئے ڈوبنے والے بچے کی لاش نکال لی، جس کی شناخت 9 سالہ حسنین احمد وگن کے نام سے ہوئی۔ لاش بعدازاں ورثا کے حوالے کردی گئی۔ ورثا کے مطابق حسنین محلے کے دیگر لڑکوں کے ساتھ نہانے کے لیے رائس کینال گیا تھا، جہاں وہ ڈوب کر جاں بحق ہوگیا۔