لاہور (اپنے سٹاف رپورٹر سے) انسپکٹر جنرل پولیس پنجاب عبدالکریم سے 54 ویں کامن ٹریننگ پروگرام کے زیرِ تربیت 6 افسران نے سنٹرل پولیس آفس میں ملاقات کی۔ وفد میں پولیس سروسز آف پاکستان سے 3، فارن سروسز آف پاکستان سے 2 جبکہ پاکستان ایڈمنسٹریٹو سروسز سے ایک افسر شامل تھا۔ آئی جی پنجاب عبدالکریم نے کہا کہ آن گرانڈ پولیسنگ، مشاہدے اور فیصلہ سازی کا عملی تجربہ زیرِ تربیت افسران کے پروفیشنل کیریئر کے لیے اہمیت کا حامل ہے۔ پولیس کے مختلف شعبوں کے امور سے آگاہی افسران کی پروفیشنل گرومنگ میں معاون ثابت ہوگی۔ آئی جی پنجاب عبدالکریم نے کہا کہ وزیراعلی مریم نواز شریف نے پنجاب پولیس کو جدید وسائل اور آئی ٹی بیسڈ ایپلی کیشنز سے ہمکنار کیا ہے۔ وزیراعلی کے محفوظ پنجاب ویژن کے تحت خواتین اور بچوں پر تشدد، زیادتی اور ہراسگی کے خلاف زیرو ٹالرنس پالیسی پر عمل کیا جا رہا ہے۔ صوبہ بھر کو آرٹیفیشل انٹیلیجنس سے لیس سیف سٹی سسٹم پر منتقل کیا گیا ہے۔ ترجمان پنجاب پولیس نے بتایا کہ زیرِ تربیت افسران کو پانچ روز کے لیے پنجاب پولیس کے مختلف شعبوں سے منسلک کیا گیا ہے، جہاں انہیں آپریشنز، آئی اے بی، ریسرچ اینڈ ڈویلپمنٹ اور ٹریفک مینجمنٹ سمیت مختلف شعبوں کے امور سے آگاہی فراہم کی جائے گی۔اس موقع پر اے آئی جی کوآرڈینیشن فاروق امجد، اے آئی جی ایڈمن اینڈ سکیورٹی فاروق سلطان سمیت دیگر افسران بھی موجود تھے۔
