بلدیاتی الکیشن امیدواروں نے انتخابی مہم شروع کر دی افسروں عملے کی تربیت

ملتان (سٹی رپورٹر) پنجاب میں بلدیاتی انتخابات کا میدان لگنے کو تیار، محکمہ لوکل گورنمنٹ سمیت تمام بلدیاتی اداروں کو الرٹ کردیا گیا ہے، افسروں اور عملے کی ٹریننگ شروع کر دی گئی ہے۔ پنجاب بھرمیں امیدواروں نے انتخابی مہم شروع کردی ہے۔ ذرائع کے مطابق پنجاب میں بلدیاتی انتخابات کے حوالے سے سیکرٹری لوکل گورنمنٹ پنجاب نے محکمہ لوکل گورنمنٹ سمیت تمام بلدیاتی اداروں کو الرٹ کردیا ہے ،افسروں اور عملے کی چھٹیاں منسوخ کردی گئی ہیں اور نئی بھرتیوں کا عمل مکمل کرلیا گیا ہے جبکہ بلدیاتی اداروں کے افسروں اور عملے کی بدیاتی نظام کو چلانے کے انتظامی امور سے متعلق ٹریننگ کا آغاز کردیا گیا ہے۔ ملتان میں میونسپل کارپوریشن ملتان اور ضلع کونسل کے 230 انتخابی حلقوں میں بعض امیدواروں نے مہم شروع کر دی ہے۔ واضح رہے کہ ملتان شہر کو 4 ٹاونز میں تقسیم کیا گیا ہے جبکہ ملتان سمیت پنجاب بھر میئر شپ کے لئے جوڑ توڑ شروع ہے، تاہم عوامی حلقوں میں پنجاب میں بلدیاتی انتخابات کے حوالے سے ماحول نہیں بن سکا ہے جبکہ عوامی حلقوں میں غیر یقینی صورتحال کا سامنا ہے ۔علاوہ ازیں الیکشن کمیشن آف پاکستان کی جانب سے بلدیاتی انتخابات کے حوالے سے تیاریوں کا سلسلہ جاری ہے۔
بلدیاتی الیکشن