آسٹریلیا میں چمگادڑوں سے خطرناک وائرس پھیلنے کا خدشہ، شہریوں کو انتباہ

سڈنی(آئی این پی)آسٹریلیا میں چمگادڑوںسے خطرناک وائرس پھیلنے کے خدشے کے پیش نظر شہریوں کو خبردار کردیا گیا۔ غیرملکی میڈیا کے مطابق آسٹریلیا میں چمگادڑوں کے کاٹنے اور پنجے مارنے کے واقعات میں اچانک اضافہ ہوگیا،جس کے بعد حکام نے شہریوں کو چمگادڑوں کو چھونے سے گریز کرنے کی ہدایت کردی ۔حکام کے مطابق ان واقعات سے آسٹریلین بیٹ لِسا وائرس سے متاثر ہونے کا خدشہ بڑھ گیا ہے،جو انسانوں میں مہلک بیماری کا سبب بن سکتا ہے۔نیو سائو تھ ویلزکیمحکمہ صحت کے مطابق ریاست کے شمالی علاقوں میں 28 ستمبر سے 10 اکتوبر کے دوران چمگادڑوں کے کاٹنے یاپنجے مارنے کے 43 واقعات رپورٹ ہوئے،گزشتہ سال اسی عرصے میں ایسے واقعات کی تعداد صرف 10 تھی،متاثرہ علاقوں میں ہنٹر ریجن، مڈ نارتھ کوسٹ، شمالی نیو سائوتھ ویلز اور سینٹرل کوسٹ شامل ہیں۔ماہرین کے مطابق آسٹریلین بیٹ لِسا وائرس کا ریبیز سے قریبی تعلق ہے اور علامات ظاہر ہونے کے بعد اس کا کوئی مثرعلاج موجود نہیں،تاہم،وائرس سے ممکنہ متاثر ہونے کی صورت میں بروقت ویکسینیشن بیماری سے بچائو میں مدد دے سکتی ہے۔حکام نے شہریوں کو ہدایت کی ہے کہ چمگادڑ کے کاٹنے یا خراش لگنے کی صورت میں فوری طبی امداد حاصل کریں۔