ہنڈی حوالہ کیس میں ملزم کی درخواست ضمانت پر سماعت ‘ ایف آئی اے کی تفتیش میں شامل ہونیکا حکم

لاہور (کورٹ رپورٹر) لاہور ہائیکورٹ میں ہنڈی حوالہ کیس میں ملزم عدیل طاہر کی درخواست ضمانت پر سماعت’ جسٹس صادق محمود خرم نے ملزم کو ایف آئی اے کی تفتیش میں شامل ہونے کا حکم دے دیا۔ عدالت نے ریمارکس دیئے کہ ملزم ایک مرتبہ جیل جاچکا ہے، اب لگتا ہے جیل جانے کا جھجک ختم ہو گئی ہے دوبارہ جیل نہ بھیج دیا جائے اور سردیاں آرام سے جیل میں گزاریں۔ عدالت نے تفتیشی افسر سے پوچھا کہ ملزم کو کس جیل میں رکھا جائے گا جس پر ایف آئی اے کے تفتیشی افسر نے گوجرانوالہ جیل کا بتایا، عدالت نے کوٹ لکھپت جیل کا ذکر کرتے ہوئے ریمارکس دیئے کہ وہاں ہوتا تو بہتر تھا، سرکاری وکیل کے مطابق ملزم کو29 جنوری 2026 کو گوجرانوالہ سے ہنڈی حوالہ کیس میں گرفتار کیا گیا تھا اور اس مقدمے میں اس نے ضمانت حاصل کر رکھی ہے۔ ایف آئی اے نے ملزم سے50 تولے سونا،23 ہزار ریال، 16 ہزار درہم اور1,200 یورو برآمدکئے تھے۔ سرکاری وکیل نے بتایا کہ برآمد شدہ سونے اور غیر ملکی کرنسی کی تفتیش کے لیے ریفرنس بنایا گیا تاہم ملزم کے شامل تفتیش نہ ہونے پر اس کے خلاف ایک اور مقدمہ درج کیا گیا، جس میں اس نے عبوری ضمانت حاصل کر رکھی ہے۔