حضرت شاہ رکن عالم کے سالانہ عرس کے انتظامات نامکمل

لاہور (خبر نگار) محکمہ اوقاف کی نااہلی حضرت شاہ رکنِ عالم کے سالانہ عرس میں چند روز باقی رہ
گئے، مگر قلعہ کہنہ قاسم باغ میں انتظامات کی نامکمل صورتحال نے محکمہ اوقاف اور والڈ سٹی انتظامیہ کی کارکردگی پر سنگین سوالات کھڑے کر دیے سیکرٹری اوقاف نوٹس لیں۔ 17، 18 اور 19 اکتوبر کو منعقد ہونے والے عرس میں لاکھوں زائرین کی آمد متوقع ہے، لیکن مقامِ عرس پر ملبے کے ڈھیر، اکھڑی ہوئی سڑکیں، نامکمل واش رومز اور ادھورا لنگر خانہ انتظامی غفلت کی تصویر پیش کر رہے ہیں۔ سوال یہ ہے کہ جب عرس کی تاریخیں پہلے سے طے تھیں تو زائرین کی سہولت کے لیے بنیادی انتظامات آخری وقت تک کیوں مکمل نہ کیے جا سکے؟ تفصیلات کے مطابق قلعہ کہنہ قاسم باغ کے مختلف مقامات پر تعمیراتی ملبہ اور اسکریپ پڑا ہوا ہے، جبکہ سڑکوں کی اکھاڑ پچھاڑ کے باعث عرس کے دوران زائرین کی آمدورفت متاثر ہونے کا خدشہ ہے۔ واش رومز کی تعمیر و تکمیل تاحال نامکمل بتائی جا رہی ہے، جبکہ لنگر خانے کی تیاری بھی مقررہ وقت پر مکمل نہیں ہو سکی۔ لاکھوں عقیدت مندوں کی آمد کے پیش نظر یہ صورتحال محض تعمیراتی تاخیر نہیں بلکہ زائرین کو بنیادی سہولیات کی فراہمی سے متعلق ایک سنجیدہ انتظامی مسئلہ ہے۔ ذرائع کے مطابق ڈپٹی کمشنر ملتان نے تعمیراتی کام مکمل کرنے کے لیے 10 اکتوبر کی ڈیڈ لائن مقرر کی تھی، لیکن مقررہ تاریخ گزرنے کے باوجود کاموں کی تکمیل نہ ہونے کی اطلاعات سامنے آ رہی ہیں۔ اگر ڈیڈ لائن پر عمل درآمد نہیں ہوا تو اس کی ذمہ داری کس پر عائد ہوتی ہے؟ متعلقہ افسران نے بروقت نگرانی کیوں نہیں کی اور عرس سے پہلے تعمیراتی کام مکمل کرانے کے لیے کیا اقدامات کیے گئے؟ یہ وہ سوالات ہیں جن کے جواب محکمہ اوقاف اور والڈ سٹی انتظامیہ کو دینے چاہئیں۔ عرس کے موقع پر ملک بھر سے آنے والے زائرین کو صاف ستھرا ماحول، محفوظ راستے، فعال واش رومز، لنگر اور دیگر بنیادی سہولیات فراہم کرنا متعلقہ اداروں کی ذمہ داری ہے۔ ایسے میں اگر آخری لمحات تک ملبہ نہ اٹھایا گیا، سڑکوں کی مرمت نہ ہوئی اور ضروری سہولیات فعال نہ ہوئیں تو زائرین کو شدید مشکلات کا سامنا کرنا پڑ سکتا ہے۔ بالخصوص بزرگوں، خواتین اور بچوں کے لیے نامکمل راستے اور ناکافی سہولیات مزید پریشانی کا باعث بن سکتی ہیں۔ مذہبی و سماجی حلقوں نے صورتحال پر شدید تشویش کا اظہار کرتے ہوئے اعلی حکام سے مطالبہ کیا ہے کہ محکمہ اوقاف اور والڈ سٹی انتظامیہ سے فوری جواب طلب کیا جائے، تعمیراتی کاموں کی موجودہ صورتحال اور تاخیر کی وجوہات سامنے لائی جائیں اور ذمہ داروں کا تعین کیا جائے۔ ان کا کہنا ہے کہ عرس کوئی اچانک پیش آنے والا پروگرام نہیں بلکہ پہلے سے طے شدہ سالانہ اجتماع ہے؛ اس کے باوجود انتظامات آخری وقت تک نامکمل رہنا قابلِ وضاحت معاملہ ہے۔ مذہبی و سماجی حلقوں نے مطالبہ کیا ہے کہ عرس سے قبل ہنگامی بنیادوں پر ملبہ صاف، سڑکیں مرمت، واش رومز اور لنگر خانہ مکمل، صفائی ستھرائی یقینی اور زائرین کی آمدورفت و سلامتی کے لیے مثر انتظامات کیے جائیں۔ اعلی حکام اس معاملے کا فوری نوٹس لیں، ڈیڈ لائن پر عمل درآمد نہ ہونے کی وجوہات کی تحقیقات کرائیں اور غفلت ثابت ہونے پر ذمہ دار افسران کے خلاف قواعد کے مطابق کارروائی کی جائے۔