لاہور(کرائم رپورٹر )گڑھی شاہو میں علامہ اقبال روڈ پر خوفناک ٹریفک حادثے میں ٹریفک سگنل پر کھڑی کار 22 ویلر ٹرالر تلے کچلی گئی جس کے نتیجے میں میاں بیوی اور ان کا بیٹا جاں بحق ہوگئے۔ریسکیو اہلکاروں نے طویل آپریشن کے بعد تینوں افراد کی لاشیں تباہ شدہ کار سے نکال لیں۔پولیس کے مطابق حادثہ گڑھی شاہو میں علامہ اقبال روڈ پر پیش آیا جہاں ٹریفک سگنل پر کھڑی کار پر 22 ویلر ٹرالر چڑھ دوڑا۔ ٹرالر کے بھاری وزن کے باعث کار مکمل طور پر پچک گئی اور اس میں سوار افراد پھنس گئیحادثے کے بعد ٹرالر کا ڈرائیور اور دیگر عملہ موقع سے فرار ہوگیا اطلاع ملنے پر پولیس اور ریسکیو 1122 کی ٹیمیں موقع پر پہنچ گئیں۔ کار کو ٹرالر کے نیچے سے نکالنے کے لیے کرین اور دوسرے ٹرالر کی مدد لی گئی۔جبکہ گاڑی میں پھنسے افراد تک پہنچنے کے لیے ریسکیو اہلکاروں نے کار کے مختلف حصے کاٹے۔ امدادی کارروائی کے دوران تینوں افراد کی لاشیں نکال کر مردہ خانے منتقل کردی گئیں جاں بحق افراد کی شناخت محمد عاصم، ان کی اہلیہ ہما عاصم اور بیٹے طلحہ عاصم کے نام سے ہوئی ہے۔ تینوں کا تعلق لاہور کے علاقے اچھرہ میں شاہ جمال سے بتایا گیا ہے۔دوسری جانب سی ٹی او لاہور سید عبدالرحیم شیرازی نے افسوسناک حادثے کا نوٹس لیتے ہوئے رپورٹ طلب کرلی اور قیمتی انسانی جانوں کے ضیاع پر گہرے دکھ کا اظہار کیا۔سی ٹی او نے ذمہ داران کی گرفتاری کے لیے تمام وسائل بروئے کار لانے اور حادثے کے ذمہ داروں کے خلاف سخت کارروائی عمل میں لانے کا حکم دیا۔ گڑھی شاہو کے علا قہ میں تیز رفتار ٹرالر کی ٹکر سے میاں بیوی اور بچے سمیت 3 افراد کی ہلاکت پر آئی جی پنجاب را ئو عبدالکریم نے سخت نوٹس لیتے ہوئے سی ٹی او لاہور سے رپورٹ طلب کرلی۔آئی جی پنجاب نے حادثے میں قیمتی انسانی جانوں کے ضیاع پر گہرے دکھ اور افسوس کا اظہار کرتے ہوئے ڈی آئی جی آپریشنز لاہور کو ٹرالر ڈرائیور اور دیگر عملے کی فوری گرفتاری کا حکم دیا ہے۔آئی جی پنجاب نے ہدایت کی کہ افسوسناک حادثے کے ذمہ داروں کی گرفتاری کے لیے تمام وسائل بروئے کار لائے جائیں اور تیز رفتاری سمیت ٹریفک قوانین کی خلاف ورزی کرنے والے ڈرائیوروں کے خلاف سخت کارروائی عمل میں لائی جائے۔
