واشنگٹن،کیف(آئی این پی )ٹیسلا اور سٹار لنک کے مالک ایلون مسک نے کہا ہے کہ یوکرین اور سٹار لنک سے
متعلق پابندیوں کا اختیار امریکی حکومت کے پاس ہے۔غیرملکی میڈیا کے مطابق ایلون مسک نے کہا ہے ک سیٹلائٹ انٹرنیٹ سروس کے استعمال سے متعلق اہم فیصلے بھی امریکی حکام کرتے ہیں، سٹار لنک کو دفاعی مقاصد کیلئے استعمال کیا جا سکتا ہے، تاہم اسے حملوں کیلئے استعمال نہیں ہونا چاہیے۔انہوں نے کہا کہ سٹار لنک کی رفتار اور استعمال سے متعلق فیصلے امریکی فوج اور صدر ڈونلڈ ٹرمپ کرتے ہیں، جبکہ سٹار شیلڈ نظام امریکی حکومت کی ملکیت اور کنٹرول میں ہے۔دوسری جانب یوکرین نے ایلون مسک کی کمپنی اسپیس ایکس پر الزام عائد کیا ہے کہ اس نے ملک میں اسٹارلنک کی فوجی خدمات پر اچانک پابندیاں عائد کرکے یوکرینی فوج کے ڈرون حملوں اور فضائی دفاعی کارروائیوں کو متاثر کیا ہے۔ یوکرینی حکام کے مطابق ان پابندیوں کے باعث کئی فوجی مشنز متاثر ہوئے، جبکہ روسی ڈرونز کو روکنے کے لیے استعمال ہونے والے یوکرینی انٹرسیپٹر ڈرونز کی کارکردگی بھی متاثر ہونے کا خدشہ ہے۔برطانوی خبر رساں ادارے کے مطابق یہ پیش رفت ایسے وقت میں سامنے آئی ہے جب یوکرین اور امریکی صدر ڈونلڈ ٹرمپ کی انتظامیہ کے درمیان اختلافات بڑھ رہے ہیں اور یوکرین کی حکومت کو خدشہ ہے کہ امریکا کی جانب سے جنگی معاونت میں کمی اس کی دفاعی صلاحیت کو متاثر کرسکتی ہے۔
