اے این ایف کا افغانستان سے منسلک منشیات اسمگلنگ کیخلاف کریک ڈائون

اسلام آباد(نامہ نگار خصوصی)اینٹی نارکوٹکس فورس نے منشیات اسمگلنگ کے خلاف جاری کارروائیوں کے سلسلے میں اہم کامیابی حاصل کرتےہوئے انٹیلی جنس بیسڈ آپریشن کے دوران افغانستان سے منسلک منشیات اسمگلنگ نیٹ ورک کے ایک کارندے کو گرفتار کرکے کروڑوں روپے مالیت کی منشیات برآمد کر لی۔تفصیلات کے مطابق، اے این ایف کے انٹیلی جنس ذرائع سے اطلاع تھی کہ افغانستان کے سرحدی علاقے برامچہ سے سرگرم ایک منشیات اسمگلنگ نیٹ ورک افغانستان سے منشیات بلوچستان کے سرحدی علاقوں میں منتقل کرنے کے بعد کوئٹہ کے راستے سندھ اور پنجاب کے مختلف علاقوں تک پہنچانے کی کوشش میں ہے۔مصدقہ انٹیلی جنس کی بنیاد پر اے این ایف ٹیم نے مشرقی بائی پاس سے متصل سیٹلائٹ ٹان کوئٹہ کے قریب ایک گاڑی کو کامیابی سے روک کر تلاشی کے دوران گاڑی کے اندر انتہائی مہارت سے تیار کیے گئے خفیہ خانوں میں چھپائی گئی 25 کلوگرام اعلی کوالٹی کی ہیروئن برآمد کر لی، جس کی مالیت 3کروڑ روپے سے زائد ہے۔کارروائی کے دوران کار سوار ملزم کو موقع پر گرفتار کر لیا گیا۔افغانستان سے منسلک منشیات اسمگلنگ کے مبینہ نیٹ ورک کے خلاف یہ کارروائی اس عزم کی عکاس ہے کہ پاکستان کی سرزمین کو منشیات کی غیر قانونی ترسیل کے لیے استعمال ہونے سے روکنے کی کوششیں جاری رہیں گی۔اے این ایف منشیات کی اسمگلنگ کی روک تھام، منظم جرائم پیشہ نیٹ ورکس کا سدباب اور خصوصا نوجوان نسل کو منشیات کے تباہ کن اثرات سے محفوظ رکھنے کیلئے ہمہ وقت سرگرمِ عمل ہے۔