مساج سیٹرزغیراخلاقی سر گرمیوں کا گڑھ پولیس اہلکار حصہ لیکر سر پرست

ملتان (انوسٹی گیشن سیل) پنجاب کے مختلف شہروں میں مساج سینٹرز، سپا کلبوں اور نجی فارم ہاؤسز میں مبینہ غیر قانونی سرگرمیوں، ڈانس پارٹیوں اور سوشل میڈیا کے ذریعے گاہکوں کو راغب کرنے کے حوالے سے تحقیقات کا مطالبہ زور پکڑنے لگا۔ ملتان سمیت صوبے کے بڑے شہری مراکز میں مساج سنٹرز کی تشہیر کیلئے سوشل میڈیا اور واٹس ایپ کے استعمال سے متعلق سامنے آنے والی اطلاعات نے قانون نافذ کرنے والے اداروں کی نگرانی اور کارروائیوں پر سوالات اٹھا دیے ہیں۔ ذرائع کے مطابق بعض مقامات پر مساج سنٹرز اور نجی تقریبات کی آڑ میں مبینہ طور پر غیر اخلاقی اور غیر قانونی سرگرمیاں جاری ہونے کی شکایات سامنے آ رہی ہیں۔ ان سرگرمیوں کے لیے سوشل میڈیا پر مختلف ناموں سے اشتہارات شائع کیے جانے، موبائل اور واٹس ایپ نمبرز کے ذریعے رابطے کی سہولت فراہم کرنے اور مختلف پیکجز کی تشہیر کیے جانے کا دعویٰ کیا جاتا ہے۔ اطلاعات کے مطابق بعض اشتہارات میں تھکن اور جسمانی درد سے نجات، اسپا سروسز، ہوم مساج اور دیگر سہولیات کی پیشکش کی جاتی ہے، جبکہ بعض اشتہارات میں گھروں پر سروس فراہم کرنے کے دعوے بھی کیے جاتے ہیں۔ حکام کے لیے ضروری ہے کہ وہ ان اشتہارات کی نوعیت، متعلقہ کاروباروں کی قانونی حیثیت اور ممکنہ غیر قانونی سرگرمیوں کا جائزہ لیں ۔ ملتان میں ہوم باڈی مساج سنٹر، لگژری مساج سنٹر، ایس پی اے مساج سنٹر، ملتان سیلون اینڈ مساج سنٹرز، بیسٹ مساج سنٹر اور بیسٹ ملتان مساج سنٹر جیسے ناموں سے تشہیر کیے جانے کی اطلاعات سامنے آئی ہیں۔ دوسری جانب بعض حلقوں کی جانب سے پولیس کے بعض اہلکاروں کی مبینہ سرپرستی اور ماہانہ رقوم کے عوض کارروائیوں سے گریز کے الزامات بھی عائد کیے جاتے ہیں۔ شکایات کے مطابق بعض مقامات پر چھاپوں کے بعد افراد کو حراست میں لینے اور بعد ازاں مقدمہ درج کیے بغیر چھوڑنے کے معاملات بھی سامنے آئے ہیں۔ اس حوالے سے پولیس حکام کو پولیس ریکارڈ، شکایات، کارروائیوں کی تفصیلات کوروزانہ کی بنیادپرجانچ پڑتال کرناضروری ہے، عوامی و سماجی حلقوں نے پنجاب پولیس کے اعلیٰ حکام، متعلقہ ضلعی پولیس افسران اور دیگر مجاز اداروں سے مطالبہ کیا ہے کہ صوبے بھر میں مساج سنٹرز، اسپا کلبوں اور نجی فارم ہاؤسز کی قانونی حیثیت کا جائزہ لیا جائے، غیر قانونی سرگرمیوں میں ملوث عناصر کے خلاف قانون کے مطابق کارروائی کی جائے اور اگر کسی سرکاری اہلکار کی ملی بھگت ثابت ہو تو اس کے خلاف بھی محکمانہ اور قانونی کارروائی عمل میں لائی جائے ۔ شہریوں نے سائبر کرائم سے متعلق مجاز اداروں سے بھی مطالبہ کیا ہے کہ سوشل میڈیا پر غیر قانونی سرگرمیوں کی تشہیر، مشکوک اشتہارات اور ممکنہ جرائم کے لیے آن لائن رابطوں کی تحقیقات کی جائیں اورذمہ داروں کیخلاف سخت کارروائی کی جائے۔
مساج سنٹرز